區瑞強開騷 彈出集體回憶

彈結他有一手的區瑞強(Albert)下月初將舉行演唱會,實行「一期一會」與歌迷相聚,並主打集體回憶。一如以往,Albert邀得一眾圈中好友包括陳百祥、曾志偉、洪金寶及胡楓等撐場,希望將演唱會變成好友聚會派對,務求要每位來賓都盡興而回!

「民歌王子」區瑞強將於4月4至6日假伊館舉行一連三場「區瑞強好友情愛你一世2014演唱會」,他表示希望每年都開一次騷,想做到一期一會以歌會友:「我做演唱會做咗好多年,有時斷斷續續,之前連續四年喺伊館開騷。我想每年做一次,因為我鍾意三個字,再重聚,意思係好想同鍾意經典歌嘅歌迷重聚。」

愛製造驚喜

Albert在圈中人緣甚廣,每次開騷都有不同好友希望上台和他jam歌,除了唱得之人如薰妮、張明敏外,Albert笑言曾志偉、洪金寶、陳百祥等非唱家班亦會給歌迷驚喜:「上年阿叻、志偉唱完,全場拍爛手掌,我識佢哋幾十年,去私人派對成日唱歌。有啲人估佢哋唔會唱歌,但我鍾意人哋估唔到。」

伊館夠親切

入行數十年的Albert絕對夠資格在紅館開騷,但他卻喜歡伊館場地細,可更接近歌迷,真正做到以歌會友,Albert說:「伊館開四面台,咁樣集中啲,最重要係歌手同音樂。」

Albert又希望每個來賓都可笑住離開:「我演唱會充滿溫情,主打集體回憶,希望歌迷聽完可以笑住走。」

文:音樂組