Kelly被讚吸收快變open

藝人陳慧琳、鄭伊健和梁家輝在李志毅執導新片《盜馬記》中大鬥演技，伊健與Kelly自二千年合拍過電影《東京攻略》後至今才再合作，他覺得現時的Kelly更肯表達自己，不像以前積極但收埋自己：「當時可能佢畀壓力自己變成乜都唔去講，只有自己做自己。又可能當時要講日文對白，成日匿埋一邊背對白。依家覺得佢會接受外界意見，加上今次劇本好多嘢要改，大家都要接受新事物。」

每分每秒學嘢

Kelly聞言說：「當時好多日文對白要講嘛，其實我不嬲都咁多嘢講，可能以前一到現場就好緊張，不停睇劇本。當時電影經驗太少未掌握到，依家梗係唔同晒啦。好享受成部電影，以前好驚o架！」今次飾演記者的Kelly坦言角色有很大發揮：「喺《迷離夜》同梁家輝合作時間較短，好唔夠喉，所以今次合作令我獲益良多，我爭取每分每秒向佢學嘢同請教。有場獨腳戲改咗對白，我要度嗰啲對白唔知點算，走去問家輝哥點做，佢好大方畀咗幾個方案我參考。」

伊健（左）、梁家輝難得再有機會較量演技！

Kelly、伊健與梁家輝多年來再度合作，十分開心。

特質未曾發揮

家輝哥則讚Kelly吸收能力強，他說：「當年同Kelly合作《迷離夜》覺得好好玩，感覺佢有好多未曾發揮嘅特質，但因為時間太短，所以好想再同佢合作。」至於他與伊健久未合作，家輝哥說：「佢出道第一部戲就係同我合作，之後冇機會碰面。所以呢部戲個組合好好玩，劇本清新，港片好多年冇呢類型輕鬆和有寓意嘅電影，所以拍得好開心。」

梁家輝

化妝：陳妙菁Fannie Chan

服裝：Loewe

鄭伊健

髮型：Jacky Ma @ Headquarters

化妝：Shuen Long @ Will Wong

服裝：Casely-Hayford、Customellow、MMM @ I.T

陳慧琳

髮型：George Shum @ Alchemy

服裝：Maje

場地：都會海逸酒店

文：影視組