五月天握手位炒貴5倍

台灣天團五月天的門票昨日十時正開售，各個售票處都出現人龍，中環大會堂售票處外一早已有過百人排隊，排頭位的是身穿風褸的南亞裔男子，隨後是四十多名菲籍女士。

大疊大牛幫找數

門票一開售，忽然有兩位手持大疊五百蚊紙的口罩男出現，聲稱「幫人畀錢」，當菲女埋櫃枱前，口罩男就負責落飛及找數。兩名口罩男掃完飛後急急腳離開，記者截停其中一名四眼口罩男，問到請班「朋友」排隊要幾錢？他不諱言說：「都係飲茶錢啫，我幫旅行社買o架咋，都係啲閒日頭排飛囉。（有歌迷投訴畀五十人打尖？）講大話！啲人又唔早啲排隊，我排咗十日啦，好似早幾日有三個女仔，一落到嚟就想排第二，仲話自己有六個人，我都有十幾個人啦，大家都係輪更，根本就冇人恐嚇，佢哋仲坐得好開心，係佢哋炒作畀怪獸睇。」之後，他與排頭位的「風褸男」上車離開，轉頭，「風褸男」折返大會堂，疑跟另一菲女「交收」。

放大圖片	門票開售後，網上即有人炒飛，980元的門票，兩張握手位飛竟標價9,400元。

現場排在第一百人左右的陳先生手持「五迷堅拒黃牛」的banner排隊，他無奈說：「只求一票」，又說會盡力掃貨以原價轉讓給其他歌迷，呼籲大家勿幫襯「黃牛黨」。至於一名報稱七旬的老婆婆揚言幫仔女排隊買飛，又說有聽過五月天，記者試探問她可有看過五月天的劇？婆婆即說：「有，J2有播。」事實上五月天沒有拍過電視劇，只拍過電影！

背囊男負責畀錢給排隊黨買飛。	口罩男拿着成疊金牛掃飛，排完隊買飛的人跟他交收。	放大圖片

尖沙咀搞到hang機

至於尖沙咀金馬倫道的通利售票處情況一樣墟冚，隊頭卅人均屬南亞裔人士，期間疑有人打尖，一度驚動警方，售票系統亦曾「hang」機近十五分鐘，大約十一點職員就宣布門票售罄。經過早上的一輪「激戰」後，網上即有人明目張膽「炒飛」，當中兩張側面第一排的握手位標價$9,400，比原價980元炒高近五倍，有網民即留言大呻：「香港真的瘋了」。五月天的主音阿信在門票開售前於網上籲香港歌迷購票時要注意安全，認真識做。

通宵瞓街 北區社區會堂（賴南秋攝）	打晒蛇餅 中環大會堂	驚動警察 尖沙咀通利

據知五月天的門票在開售一百分鐘，七場門票全部售罄，主辦機構表示為滿足歌迷，今次連信用卡優先訂購，有近七成門票公開發售，對於有人在網上將980元票價炒高至$4,700一張，發言人說：「真係呼籲歌迷唔好買黃牛飛。（今日好多排隊黨即場交收？）真係無可奈何，控制唔到，難為咗啲用家，希望警方喺有大型受歡迎演唱會門票發售時，可以到各站維持秩序。」

文：音樂組