陳慧琳額頭割傷擔心毀容
陳慧琳（Kelly）昨日與影帝梁家輝、鄭伊健等在北京出席首映，驚見Kelly額頭有條兩吋長的疤痕，站在台上的她不時露出尷尬表情。事後她接受電話訪問時透露因跌爛化妝鏡而割傷額頭，擔心靚樣不保。
喜劇《盜馬記》昨於北京舉行首映，Kelly、梁家輝、鄭伊健、曾志偉、王祖藍及Mandy Lieu等現身撐場。穿春裝的Kelly大晒香肩，美艷動人，但始終不及其額頭上近兩吋傷痕矚目，更不時露出尷尬表情。問她傷勢情況時，她大方地說：「我希望電影上映後，好似我額頭一樣『爆紅』。」她又笑指伊健曾兩次「爆軚」，令伊健當場面紅紅。
囝囝在旁唔敢喊
之後Kelly接受電話訪問時透露受傷原因，更擔心毀容。她說：「我前晚執行李時撞跌咗塊化妝鏡，我被鏡角割到額頭。當時真係好痛，但都冇睇醫生，止到血就算。（當時痛到喊？）痛到癲都忍住唔喊，因為囝囝喺隔離，想教佢要勇敢啲。不過化妝都好驚令傷口感染而發炎，仲會戒口，咩都唔敢食！（驚破相？）係，驚有疤呀！不過冇辦法，依家日日都要在內地為電影宣傳，要等到下星期香港首映先返到嚟。」
另外，志偉和祖藍於首映上玩唱雙簧寸梁家輝，祖藍先向家輝賣口乖稱：「家輝哥是我偶像，演技非常之厲害！而且他會幫我分析劇本，我要達到他的『高度』，要繼續好好修煉才行！」
曾志偉寸梁家輝
志偉則大爆家輝對劇組指手畫腳：「梁家輝在劇組最愛做『領導』，他將導演的工作都做了，對每個人的戲都『指手畫腳』，不知為何大家都會聽他指導。」
文：影視組