諸葛怪獸家長隨時再搬
分別於去年底先後榮升為父母的諸葛紫岐（Marie）與陳豪昨日出席活動談及愛兒時，均一副有子萬事足的模樣。Marie自言為了囝囝將來學業，已搬家的她隨時可以再搬，無懼被指怪獸家長。而朱潔儀則拒追求者送車 。
諸葛紫岐和陳豪這兩位新手媽咪和爹哋昨齊為活動擔任嘉賓，同場還有混血模特兒Amanda S.及朱潔儀等。Marie的囝囝將滿百日，會為囝囝舉行百日宴。Marie透露囝囝現在已有17磅，一日吃5餐，由原來吃人奶轉為吃奶粉，下星期便會為囝囝舉行百日宴，問到是否星期六舉行，她說：「都係嗰啲日子啦。」到時她只需負責湊B，其他都不用操心，打算擺廿多圍宴請親友。
朱潔儀拒收名車
諸葛又指丈夫錫囝囝錫到燶，還扮扁嘴說：「佢依家好偏心。（有冇冷落你？）都有少少o架，OK啦。（會唔會再生？）問番佢，一個都唔知佢搞唔搞得掂，睇緣分。」她自言給予丈夫和囝囝很多愛，對於有傳她為囝囝將來學業而搬家，她坦承確有此事：「係呀，搬咗去跑馬地。（第時為其他學校又再搬？）我會做得出o架，個仔好緊要，做媽咪會為個仔付出好多。（驚唔驚畀人話你怪獸家長？）唔驚，話我咩都得，為咗個仔我係唔會介意嘅。」
而朱潔儀自爆近日有追求者送車給她，不過她已即時拒絕對方的好意。她說：「佢問我想要咩車，話送部車畀我，我哋識咗唔係好耐，同埋唔想無端端收人家禮物。希望啲男士唔好以為女仔個個都鍾意物質，最重要係性格夾，女仔唔一定鍾意名牌。我覺得食燭光晚餐，陪吓自己仲更加冧。」
「豪B」擺百日宴
同場的陳豪就表示和太太陳茵媺全心全意照顧囝囝，可能會忽略了夫妻間的感情，因囝囝實在霸佔了他們太多時間。問到會怎樣氹太太，他說：「做啲基本嘢，食吓飯送吓花，物質唔係太重要，係心思同時間。」囝囝已改了中文名，暫未能公布，他亦會為囝囝舉行百日宴。
文：名人組