鋒味籠罩法國百人爭影
影帝謝霆鋒近日遠赴法國拍飲食節目，型到震的他順道出席時裝騷，連一班外國傳媒都被他的Chok爆氣場吸引，有近百記者圍住他拍照，造成一陣混亂。霆鋒到達花都亦不忘就地取經學做甜品，希望做個入得廚房出得廳堂的型男大「煮」廚！
謝霆鋒正於巴黎拍攝浙江衞視美食節目《十二道鋒味》，亦順道出席巴黎時間周二的Valentino時裝騷。一向Chok到爆的霆鋒到達時裝騷場外，即引起一陣騷動，連一向見慣型人的外國傳媒都被霆鋒吸引，有近百記者將霆鋒包圍，大會亦出動兩名法國保鏢保護他。
被踩鞋踭險仆
被大批記者纏身的霆鋒亦識做地擺出Chok爆甫士讓他們拍照，猶如上演一場「鋒」騷時裝活動。睇騷後霆鋒又到羅浮宮附近教堂留影，型人配靚景可謂襯到絕。
霆鋒經理人霍汶希接受越洋訪問時提及霆鋒被圍的情況：「我哋一去到，場面就混亂，有路人跌倒，大會仲請咗兩個法國保鏢畀我哋。霆鋒又畀我踩到鞋踭險仆親，霆鋒事後仲講笑咁話：『估唔到最後畀經理人踩到跌倒！』」
今次霆鋒會在法國逗留十日拍攝，並邀得舊愛王菲好姊妹趙薇和范冰冰任嘉賓，他亦不忘取經吸收新「煮」意，學整法式甜品，又於巴黎時間昨午二時到當地唐人街市場買新鮮食材。
王菲行蹤未明
問霍汶希霆鋒會否和同樣身處巴黎的王菲會面，霆鋒透過霍汶希表示不回應。對於有雜誌指霆鋒為免刺激前妻張栢芝而迴避與王菲會面，霍汶希說：「我哋冇講過任何嘢，霆鋒冇接受過任何訪問。」
至於另邊廂的王菲，她出席完Celine2014秋冬時裝騷後，已沒有其他活動。王菲動向雖未明，大家仍高度關注她與霆鋒的「世紀重逢」會否出現。
文：音樂組