梁家樹榮休 三哥讚：完美句號
服務無綫近40年的戲劇製作總監梁家樹榮休，昨晚在電視城西餐廳大搞榮休酒會玩足三粒鐘，無綫一眾高層和近二百名藝人到場，場面星光熠熠，墟冚如台慶！席上無綫頒贈金牌予梁家樹，志偉和苗僑偉還自掏腰包買巨型蛋糕贈興。
無綫昨晚在電視城西餐廳為梁家樹搞榮休酒會，行政主席梁乃鵬、集團總經理李寶安、助理總經理區偉林均有出席，接近二百名無綫藝人到場，包括林峯、佘詩曼、苗僑偉（三哥）、曾志偉、吳啟華、黎耀祥、汪明荃、岑麗香、苟芸慧、陳敏之、黃智賢、馬賽、滕麗名等，梁家樹太太、仔女和孫兒亦有現身，星光熠熠！
係時候新嘗試
無綫即場頒贈金牌予梁家樹，志偉和三哥還自掏腰包訂造十二呎長的巨型蛋糕送給他，梁家樹雖辭任戲劇製作總監一職，但仍會擔任製作部高級顧問，他說今次離開的確感觸良多：「我65歲啦，想趁住仲有活力同精力試吓新環境，TVB保護咗我幾十年，係時候作新嘗試，今次唔係為咗錢嘅！」稍後他將到內地做製作人，主力影視製作。
惡人變得慈祥
認識了梁家樹卅多年的三哥，大爆對方在《歡樂今宵》時代是「十大惡人」，出名「掗拃」，他說：「不過近十年改變好多啦，慈祥咗好多！依家算係一個完美嘅句號。」而林峯則表示是梁家樹帶他出身，他說：「以前好多劇都係梁家樹帶畀我嘅，之前他搞gathering我都會去佢屋企玩。」他相信將來若有適合的角色，梁家樹也會找他演出。
文：影視組