江若琳透底力保不失
江若琳前晚以大露背裝配上透視裙出席花生騷，透視裙下將其長腿盡現之餘，連喱士打底褲都若隱若現，性感程度令人側目。問到為何如此性感？她竟懵然不知自己露出玉背。
藝人江若琳（Elaine）前晚為造型師好友行騷，她以大露背裝配上透視長裙亮相，除了背部留下bra印外，透視裙內的喱士打底褲若隱若現，十分誘人。問她是否獲好友特別眷顧，安排穿上最性感的一套服裝 ? 她說：「我算性感咩？我忙住準備開騷，都未睇其他人，朱慧敏都露背啦。（你露得勁啲！）我有露背咩？我冇為意，我做足防走光措施，所以唔怕走光。我依家無論着乜都打定底，檢查好晒，萬無一失。」她笑言因為貪靚選擇了一對9吋高跟鞋，反而擔心會仆倒。
另外，同樣大露背的藝人朱慧敏透露：「我呢條裙本來係上年台慶着，但後來我有事出席唔到，不過同條裙好有緣分，今日可以着番。」Queenie表示十六歲便開始行騷，問到曾否與楊崢同場？她即說：「冇合作過，朋友聚會見過，當時好多人所以冇咩印象。我唔comment任何嘢，唔關我事！」
莊思敏密實
而藝人莊思敏密實到場，她說：「唔使成日sexy，間中就夠，有人性感咪得囉！」對於早前爆楊崢曾經catwalk失場，問她有否收到對方電話？她說：「如果佢要搵，唔只搵我一個，咁多人講佢。（傳佢有私生女？）我電台嘅同事都有講，話呢個傳聞傳咗好耐！傳聞沒完沒了，厭厭哋。人哋嘅生活唔關我事！」
文：影視組