妮琪曲折救阿澤
田蕊妮與薛凱琪（Fiona）兩個性情中人，一係大笑，一係大喊，沒有灰色地帶，阿田帶淚感激Fiona於老公杜汶澤患怪病時到訪打氣，再告知當時身在內地的阿田要專心工作，然後幫忙照顧阿澤。而Fiona更以疲勞轟炸方式逼阿澤睇她介紹的醫生，令阿澤一度感煩厭熄電話，Fiona即自辯說抑鬱症康復後，會把注意力集中別人身上，但沒想過此舉令朋友感壓力，幸好阿澤在老婆和Fiona悉心照顧下康復，過程雖曲折，結果卻令人滿意。
田蕊妮：田 薛凱琪：薛
互窒見真情
薛：同你熟係因為我哋有個共同朋友，佢帶我去你哋屋企玩，初頭都唔係好熟，只係覺得有好感，當時同你老公又未合作，都未熟。
田：唔係嘛？我見到你成日(目及)住我老公喎！
薛：唔好意思，你個視網膜係咪有啲問題，我估你仲有斜視同輕微白內障。
田：仲想話呢個女仔品味都幾好添！
薛：你有啲妄想，成日以為你老公係梁朝偉。一大班人會選擇同你講嘢多，直至拍《爛賭夫鬥爛賭妻》先同你哋熟，拍《人間喜劇》時都冇傾偈，因為嗰時我癲o架嘛。
田：你當時情緒好緊張，少少嘢都容易有觸發點，例如唔見咗支睫毛液都會嗌晒。
薛：同你老公拍咗四部戲，都好多空閒時間傾偈，有講到你，從佢口中覺得你哋好扶持大家。
田：佢日日返嚟我都扶住佢。
出愛心煲湯
薛：我好欣賞你對愛情不離不棄。
田：因為我冇選擇嘛！識你最初感覺好細路女，亦好幸福，鍾意唱歌就入行，中間冇乜聯絡，之後你突然轉變，變咗神經緊張，呢行摧毀咗好多人。後來從老公口中知你啲嘢，睇你訪問先知原來有事情發生咗，令你生活有大轉變。到再次見番時發覺你大個咗，以前被人照顧，依家倒轉，個程度令人有啲驚，會令你冇得呼吸，不過出發點係好。
薛：係啦，我介紹醫生畀你老公，結果被佢鬧。
田：最感動係老公病，你第一個去探，仲買好多零食，又表演氹佢開心，真係好感動（流淚）。當時你戴住口罩，兩眼含淚望住我老公，驚佢會死。我又唔喺香港，你打嚟同我視像通話，叫我唔使擔心，畀心機拍劇，因為第一次返內地拍劇，你不知幾緊張我事業，仲話我係好演員，製作咁好，叫我放心工作。
薛：記得你老公仲影咗我一張相。
田：嗰吓我真係忍唔住喊，你好可愛，仲叫媽咪煲菜湯，話會拎去畀老公食，我老公影咗碗菜湯嘅相畀我睇，見證到你媽咪當佢係BB，啲料切到一粒粒，應該畀未出牙嘅BB食，真係好感激佢，心諗平時你係咪唔使用牙食嘢。
薛：因為你老公當時話我聽，佢狀況係流口水，咁咪要切到咁細粒。
瘋狂逼睇病
田：你瘋狂鍾意照顧人嘅心態，的確令我哋好感動，但我哋係成年人，有時會有壓力。
薛：哈哈！我係咁介紹一個醫生畀阿澤，我知呢方面係好個人，但我逼佢睇，覺得個病有機會有生命危險。
田：我老公個病最緊要係休息，唔可以講太多嘢，你不停WhatsApp同打電話畀佢，最後佢要熄電話。
薛：後尾佢好忟咁同我講，話唔係覺得醫生幫到手，係因為我所以去睇一次。
田：最近你耳仔有唔舒服都擔心你，你係一個有壓力嘅人，將工作拉到好緊，我唔會逼你叫你放鬆，知你性格，希望有時間慢慢將條橡筋放鬆啲。
薛：我係神經緊張，之前經歷過病後有回顧，點解有人得到呢個病，我真係幾慘，某程度係自我中心一種，所以我就將集中點放去人哋度，少啲諗自己。
田：但你依家係集中晒呢！
薛：嗰期搵唔到人幫忙嘛！除咗做嘢，其他嘢盡量諗人哋。記得有次打邊爐，你同阿澤同我分析人格，話我性格太強，開心會特別開心，咁真嘅性格，如果陌生人接觸係咩一回事？
田：如果你有男朋友會好啲，有愛情立刻平衡番。
薛：日日做嘢邊有拖拍？一個月得一、兩日得閒，我放假寧願同啲密友傾偈食蛋糕。
後記：插嘴賴年紀大
有人話三個女人一個墟，其實有時兩個女人都可以有這個效果，阿田與Fiona受訪當日一見面已經講唔停。每當Fiona講到興高采烈，阿田就會插嘴，聲浪比Fiona還要高，此情況於兩小時內，出現不下數次，難怪Fiona忍不住說：「你畀我講埋先啦！」口才了得的阿田即反駁：「你畀我講啦！我年紀大，怕一陣唔記得！」令Fiona哭笑不得。
文：影視組
攝影：吳文聰
場地：Vista@Sky100
薛凱琪髮型： Jo @ Salon Queens Private i
化妝：Jessica Chan