超盈吹水講mood冷待貪曽子
去年大學畢業的何超盈，近年主要幫媽咪打理生意，昨日凌晨時分，超盈與好友到中環夜店消遣，人緣甚佳的超盈，當晚如「車輪轉」般畀仔圍，「貪曾子」曾慶淳也加入「戰團」，但超盈卻冷待對方，寧與霍啟山咬耳仔。
曾經歷過貪玩時期的賭王千金何超盈，自從大學畢業後，減少夜蒲之餘，亦幫媽咪打理業務。昨日凌晨1時許，超盈難得趁假期前夕輕鬆，與好友林愛兒及數名男女友人到中環夜店消遣，於場內巧遇霍啟山及「貪曾子」曾慶淳等。
間條男搭香肩
超盈當晚心情格外興奮，精神飽滿、肥咗又靚咗的超盈，被身邊有不少男士「車輪轉」上前搭訕，但她不是人人搭理，女友石珮琳不在身邊的曾慶淳主動上前向超盈「抓水吹」，但她反應冷淡，跟他傾了幾句後，隨即與身旁的間條男傾偈，間條男主動搭住超盈香肩，頭貼頭咬耳仔，態度親暱，令在旁的曾慶淳十分無癮。不想坐冷板櫈的曾慶淳，最後隨便搭個女仔膊頭吹水，但對方同樣不太理他。
林愛兒眼超超
超盈與間條男傾完一輪，隨後與一名身形略胖的男子寒暄數句，便轉身跟其他朋友繼續玩。之後霍啟山在場內巧遇超盈，兩人上前咬耳仔，此時被冷落的林愛兒站在旁邊眼超超，顯得有點不是味兒。盡興玩至凌晨4時許，曾慶淳與霍啟山等步出時，啟山甫見記者在場即轉身單拖從後門離開。約15分鐘後，精靈的超盈扶住飲醉酒女友人步出，之後一行人步往附近登車離開。
文、攝：追蹤組