DaDa額頭撞牙爆缸捱13針

DaDa昨午在Instagram自爆額頭受傷，正趕往醫院縫針，並上載一張撥起頭髮露額的自拍照。見其傷口貼了一大「劈」膠布，但未有見血，驟眼看以為是她拍戲時的特技化妝，萬萬想不到整件事離奇過拍戲！

原來DaDa前晚年初八出席好友生日派對，由於現場人多擠迫加上燈光昏暗，當她與一眾女性朋友圍埋坐吹水，大家左擰右擰傾得興高采烈之際，DaDa額頭不慎與身旁的高妹好友牙齒激撞，無情力之下即時爆缸，淚灑當場！高妹亦被撞甩門牙！

女友人牙都甩埋

昨午三時許，DaDa在助手陪同下乘保母車現身法國醫院，戴黑超、穿便服的她甫現身即被記者上前慰問傷勢，她笑笑口表示前日出席派對時，因撞到友人棚牙而爆缸，傷口長度長達3分1隻尾指。未試過縫針的她說：「撞到嗰陣我都痛到喊，朋友即刻幫我做臨場處理，用冰敷住傷口同送我睇醫生。（唔即時縫針？）因為當時專科醫生唔喺度，所以就建議我今日（昨日）先嚟睇專科，驚有疤。」

新年流流見紅，DaDa笑言當「紅」運當頭。（設計圖片）	憶述受傷過程時，DaDa不時輕摸傷口。	DaDa撕開膠布展示又長又深的傷勢。

問到新年期間發生意外會否擔心不好意頭？DaDa說：「唔怕，當『紅』（鴻）運當頭！」她又稱不怕破相，出事後已開始戒口：「之後會休息幾日。（影響工作？）嚟緊拍新戲《Z風暴》會拍追車戲份，可以遮到傷口。（驚破相嫁唔出？）唔驚，我仲有market，發生事嗰陣都有好多男性朋友幫手。」

前晚DaDa出席派對時，好友蔡瑩瑩（右）亦在場。

擰轉身傾偈的DaDa，其額頭撞甩高妹門牙。（設計圖片）

撕開膠布報平安

至五時許DaDa始離開醫院，滿臉愁容的她坦言沒想過傷勢如此嚴重：「下星期二、三要再嚟覆診，七日後拆線，冇諗到咁嚴重，頭先有打麻醉針，淨係傷口表面醫生話縫咗十三針，裏面都縫咗好多針，好在冇毀容，自己都算好彩啦，反而個friend要補牙就慘啲，佢一隻門牙甩咗，另一隻門牙就崩咗！」她表示今日要出席電影公司春茗，擔心影響儀容：「好彩醫生話冇咩大礙。」事後DaDa再在微博上載撕開膠布的傷口相報平安。

另外，有份出席該派對的DaDa友人，於社交網上載DaDa受傷前跟友人合照，o靚模蔡瑩瑩亦在場，不過慘被DaDa撞到甩牙的女友人則未見蹤影。而DaDa舊愛王宗堯昨亦在微博留言慰問：「小心些。」

文：專案組