發哥態勇挑戰億萬票房
【陳偉立北京直擊】神級影帝周潤發今年強勢回歸賀歲檔，兩片同日於中國及香港上映變成自己打自己，「新賭神」單挑「玉皇大帝」！日前發哥在北京接受《東網》專訪，問到總票房過億已毫無疑問，更有望成為「10億男星」，發哥笑言心情特別：「希望套套都收得，老闆賺錢，下次又搵番我。」
回想廿年前的賀歲檔被「雙周一成」雄霸，大家爭睇周潤發、周星馳及成龍。時至2014年，狀態大勇的發哥強勢回歸，在賀歲喜劇《賭城風雲》中重現賭神風采，在另一套《西遊記之大鬧天宮》中則飾演玉皇大帝，罕有地中港兩地「自己打自己」，無論哪套片跑出，發哥似乎也立於「不敗之地」！
貴片酬．有價有市
日前發哥在北京接受《東網》專訪，他笑言心情特別，希望兩套票房都大收：「內地都係首次撞埋一齊，原本《大鬧天宮》係暑假上，可能覺得賀歲片檔期啱一家大細睇，所以推前咗，但呢套唔係以我為主，係甄子丹，我只不過係掹車邊，哈哈！（兩套票房加埋，大有機會收十億票房？）有就開心，多謝老闆，冇嘅話，我都盡咗力。（信心？）有梗係有！做演員梗係希望套套都收得，老闆賺錢，下次又搵番我。」對於有內地製作人投訴有演員片酬太高，發哥認為一切在商言商：「如果你話貴咪唔好請佢囉！有人甘心命抵去請佢嘅時候，即係證明有咁嘅市場。」
為人親切的發哥曾以友情價接拍許鞍華作品《姨媽的後現代生活》及獨立電影《獨自等待》，他直言現時並非為片酬接戲，以興趣為大前提，他還想飾演甚麼角色？發哥說：「最緊要過癮咗個角色先，其實我每套戲，就算都係揸槍，角色都唔同，電影太多變化，永遠唔會有一套戲係滿足到，唔同年紀做唔同角色，到咁上下做人爹哋、做人uncle，某個歲數，人哋offer你做咩咪做咩囉！」
嘆觀眾無情．怕割櫈
提到荷里活不時將英雄人物電影重拍又重拍，發哥會否拍《英雄本色2014》或《龍虎風雲2015》？他笑言觀眾要求愈來愈高，怕觀眾會不滿割櫈：「好難！再拍番觀眾會要求比當時再堅啲，觀眾係好無情，買張飛要你超越自己，點會做啲咁危險嘅嘢？除非好似史泰龍咁仲喺度打緊。（搵番狄龍、梁朝偉再合作？）你先話依家啲演員咁貴，又想整套咁嘅嘢？邊個畀錢去拍呀！」
on.cc東網
《東網》遠赴北京獨家專訪影帝周潤發，今日播出《發哥專訪2》，他繼續滔滔不絕分享人生閱歷，大家密切留意。