雨僑何佩瑜扮靚無罪
藝人雨僑與何佩瑜（Jeana）因合作電影而認識。兩位八十後前衞女性有多方面不同的話題。雨僑喜歡扮靚、甚至教人化妝及打扮，另邊廂何佩瑜來得更勇敢，不惜「人工」改造，二人都是希望尊重伴侶，同時亦希望對方尊重自己。兩位極端性格的女仔更對時下女性的愛情觀有不同的見解。
雨：雨僑
何：何佩瑜
整容冇問題
何：我之前都係睇電視見過你，對你印象深因為你個樣甜美。後來有機會同你合作《喜愛夜蒲3》先有機會接觸你。最記得有次我哋一齊上《獎門人》節目，我突然跌咗隻有色隱形眼鏡，當時一隻眼睇唔到嘢，你好主動問我需唔需要借一對畀我，嗰次就令我對你有好印象，你份人好細心。
雨：你仲記得？哈哈。我覺得你好豪氣、係義氣女仔。之前聽過同事講你份人唔錯，好玩得，所以都預咗同你合作會好開心。其實同你做對手同場唔係好多，反而喺宣傳期見多咗你，覺得你好爽直，我份人就慢熱啲。其實我覺得你公開曾經微調加工面容，真係好勇敢。
何：因為當時我簽咗代言人，免費之餘仲有專業醫生同你分析。當時我可以好放心，因為佢唔係為咗賺你錢而sell你。我同醫生講想塊臉會立體啲、有層次啲，皮膚靚啲咁。我唔係要好大工程，自己都怕出街撞口撞面，做一個演員有獨特嘅樣貌會好啲。我覺得係一個機會，冇後悔過。
雨：其實你好厲害，有勇氣同大家講做過啲微形整容，我自己有幾次想去割雙眼皮，但最終都唔敢踏出第一步，可能我冇你咁大膽。我覺得個樣係自己，如果真係有需要都可以去整，唔需要同人交代。
氹男友開心
何：其實我覺得貪靚唔係為自己，而係對人嘅尊重。點解女仔出街食飯要花心機set頭、化妝，仲襯晒高踭鞋，你唔見我喺屋企對媽咪化晒妝？因為大家係親人太熟，但對外、對朋友化妝係尊重，所以要靚。
雨：我就覺得貪靚係為自己喎，自己會開心啲。我鍾意試不同裝扮其實令自己係開心啲嘅。滿足自己。
何：其實都有個原因，就係唔想身邊另一半或男朋友冇面囉。以前試過拍拖同男友出街，如果打扮靚啲，男朋友真係會對你好啲o架，如果唔係佢就全日冇晒mood咁。
雨：有時都會聽到朋友講人哋個老婆有幾醜樣、人哋個女朋友有幾殘、有幾唔掂。我唔想成為被人喺背後講嗰個受害者囉，所以無論有咩聚會，大家記得一定要靚。
夜蒲易出軌
雨：其實拍《喜愛夜蒲3》前，我都好介意另一半去夜蒲。拍完就更加唔可以畀另一半夜蒲。因為依家夜場啲女仔好直接，異性埋身好容易。啲女仔主動到一埋嚟就坐男仔大髀。就算另一半係乖仔，但佢啲朋友唔乖，都好容易受影響。女仔一嚟就坐大髀，咁叫你點忍。如果個人本質容易出軌，唔理蒲唔蒲都有機會，但夜場個危機感會加大。
何：反而我依家唔介意。因為我睇化咗。我係會將自己做到最好，問心無愧，用自己去感動佢，咁先係最長久。管係唔得，管得一次都管唔到第二次。我記得初戀男友好大男人，試過着件T恤都黑我臉，話我太性感，塊臉由朝黑到晚，根本就係表現到男性自私嘅一面。我好怕呢啲男人，佔有欲太大，衣着都管就太過火，所以我依家好享受單身生活，唔使畀人管。我拍過四次拖，我覺得次數多係一件好事，無論結果係好定唔好、開心或唔開心，最終對自己嚟講都係經驗，係成長過程要經過嘅事。
雨：我就拍過五次拖，我都認同你個觀點。我有個朋友三十幾歲第一次拍拖，到頭來失戀就要生要死。
拒男友拎袋
何：你有咩男仔會對佢扣分o架？
雨：我好怕人嘈o架，郁啲就勞氣，可能我爸爸係咁，永遠冇細聲溝通，希望日後另一半唔好勞嘈。
何：我怕男仔執着、固執唔肯去變。如果個男仔唔肯去變，講極都唔改，呢種人最得人驚。人哋講得意見畀你聽即係你有問題，但你都唔去改就更有問題。同埋我唔鍾意男仔幫女仔拎手袋。
雨：我覺得女仔唔係奉旨囉。手袋唔使男仔拎。男仔對女仔好其實有好多方法，幫女仔拎袋其實好表面，個手袋有幾重呀，個女仔其實自己拎到囉。
何：如果街上面見到個男仔幫女仔拎手袋，我覺得個問題喺個女仔度，反映到個女仔好肉酸，畀朋友睇到你男朋友咁，你自己都覺得自己肉酸啦，咁點解要咁做？
雨：同埋我覺得女性唔需要每次食飯都要男仔畀錢囉，可以試下一人一次。有時開心事都可以女仔請客。
何：讀緊書時就會夾錢，坦白講依家男女朋友食飯，香港男仔都會主動畀錢，好有風度。如果大家係情侶關係，男方主動畀錢，而女仔走去同佢爭住畀，反而令個男仔喺大庭廣眾度好肉酸，好似落佢面咁，隔籬枱睇到會諗點解個男仔要個女仔畀錢？
後記：衝出香港結婚
雨僑和何佩瑜同為八十後，對於緍禮亦有同一概念，二人均希望在海外舉行婚禮，因感到香港結婚儀式比較局限，不夠新潮。何佩瑜表示希望在四十歲前結婚，並想在玻利維亞舉行婚禮，穿上婚紗在鹽沼上踏入人生另一階段，感到相當浪漫。
雨僑則希望到夏威夷舉行婚禮，因自己喜歡陽光與海灘。原來二人還有共同嗜好，喜歡下廚的雨僑最擅長西餐，而何佩瑜則相反，中餐和煲湯才是她的強項，二人笑言女人入得廚房，才是管治丈夫的最佳方法。
雨僑 ─ 髮型：Jay Yeung
服裝：October 1
何佩瑜 ─ 髮型、化妝：Daniel @ ChinG
場地：The Central Wine Club
文：影視組