陳潔玲林泳淘 晚晚赤裸裸
曾參選12年港姐的陳潔玲、林泳淘早前結伴遊越南拍旅遊節目，二人自爆「肉帛相見」，齊齊赤裸裸浸浴，十分香艷。另外二人又買男性生殖器官作手信送給藝員訓練班的老師鄭丹瑞，作風真大膽！
2012年港姐的陳潔玲（Christy）、林泳淘（Wingto）早前到越南十日為旅遊節目《情迷越南》拍攝，首次做主持的二人均表示這趟旅行增廣了不少見聞，最難忘的是去參觀占婆族，她們說：「以前佢哋成日打仗，希望多啲人口，所以就拜男性同女性嘅生殖器官，原來佢哋仲有個習俗，就係將啲羊奶倒落男性生殖器官嘅雕像度，再流出嚟喺下面飲番，象徵男性雄偉嗰一刻，女仔飲咗就可以生好多個。」
阿旦收手信Ｏ嘴
不過二人就怕怕唔敢飲：「因為入面好舊，係成百幾年前嘅古蹟，好污糟，但係我哋有買紀念品，當畢業禮物送畀訓練班最尊敬嘅鄭丹瑞先生，佢收到都O咗嘴，話估我哋唔到。」
一凹一凸夠默契
文靜的Christy和活潑的Wingto有着一凹一凸的性格，但二人從未曾拗撬，Christy說：「我哋選港姐時都已經識咗段時間，好了解大家，唔使再花時間磨合，佢講一句我就可以接到第二句。」Wingto亦笑言她們感情好到十日都「肉帛相見」:「我哋每日都一齊敷MASK，一齊浸浴，每晚都好赤裸裸。」這個節目亦令Wingto愛上了當旅遊節目主持：「自己性格都鍾意玩同周圍走，我訓練班一畢業就入《東張西望》做主持，所以啱綜藝方面多啲。」而Christy就希望多元化發展：「我鍾意拍劇多啲，啲人話拍劇辛苦冇得瞓，但係有個角色畀我就好開心。」
文：影視組