鄭融冇尷尬 出絕招擘髀
鄭融和音樂人前男友莊冬昕（Ben）分手多時，但再見亦是朋友，除自薦任MV導演外，更出動人情牌邀好友為她任MV客串嘉賓，而鄭融亦傾力演出，搔首弄姿，晒腰兼擘髀，騷味十足，她直言：「同Ben好夾，好有默契。」
鄭融近期忙於綵排下月頭舉行的九展演唱會外，更抽空為個唱主題曲《Live Like 18》拍攝MV，成功修身的她大騷身材，露腰、晒腿，又表演後一字馬絕招，可謂技驚四座！
現場見其前男友Ben出現，問鄭融對方是否來探班？她笑住說：「唔係呀，呢首歌係佢作曲o架，知要拍MV時，佢主動話做埋導演幫我拍，佢本身都好鍾意做導演。」最令鄭融感動是MV想拍出派對的感覺，所以Ben碌人情卡請來逾10位好友客串，她表示：「佢哋個個各有專長，有啲係狄易達軍團嘅成員，仲有魔術師、街頭滑板高手、YouTube達人等，有佢哋演出，成個MV好熱鬧，好繽紛，好好玩。」
唔怕男友呷醋
問到鄭融擘後一字馬可有難度？她指難度可接受，皆因她一向有練舞及瑜伽，身手敏捷，又謂：「其實同前一字馬難度差唔多，只係想特別啲同靚啲，排舞師先有呢個安排啫。」談及和前男友Ben再合作可感尷尬？她以肯定的口脗說不會，雖然做不成情侶，但都可以做朋友：「我同Ben好有信任同默契，不過只限於音樂上，今個演唱會Ben會做我音樂總監添。」
問屆時如現任外籍男友捧場，新歡、舊愛碰面可難為？她又說：「依家仲未知男友會唔會嚟捧場，因為佢成日周圍飛，就算佢哋兩個真係碰到都唔怕，因為大家好成熟，唔會爭風呷醋嘅。」
文：音樂組