舒淇性在胸狠
影壇盛事台灣「第50屆金馬獎」頒獎典禮圓滿結束，無論獎項花落誰家，有獎定無獎，一眾女星的悉心打扮都值得嘉許，而品牌Elie Saab更成為今期紅地氈之最。星級造型師Ricky Kwok（郭慶彬）點評舒淇的超deep-v晚裝裙夠「胸」狠，憑着天賦本錢着出既性感又高貴的古典美，卻不及桂綸鎂的富時代感晚裝裙，造型sharp得有型！
劉嘉玲 Elie Saab 2013秋冬高級訂造服
條裙鑲滿水晶刺綴，手工已夠花巧細密，佢好醒配對長鑽石耳環兼梳個all back髮型，令整件事似足女皇出巡，好有霸氣，唔需要性感都一樣可以壓到台。
桂綸鎂Alexander McQueen
行紅地氈大多着得有高貴女人味，佢呢款裙好有時代感，deep-v位拼合nude色料，驟眼望誤以為真空上陣，加上入膊同露背設計，着得佢又高又瘦，造型sharp得有型。
舒淇Valentino2013秋冬高級訂造服
Deep V位恰到好處，唔一定要波濤洶湧先至係性感，佢天賦演繹得恰如其分，簡單配襯鑽石手鈪同戒指，古典，高貴與性感集一身。
張曼玉Elie Saab 2013高級訂造服
佢平時都係走型格路線，喱士裙款好簡單，但着到佢好有star power，加埋珠寶鑽飾搭夠，令人眼前一亮，好耐冇見佢着得咁grand。
秦海璐Stella McCartney
好肉酸，又着得佢有少少肥， 黑白2-tone都救唔到，呢條裙太過簡單，普通晚宴就ok，加番對大耳環會更靚，不過紅地氈唔夠照。
何韻詩Emilio Pucci
平時男人頭打扮，今次轉着大露背晚裝硬sell曲線兼女人味，同佢中性風格完全格格不入，嫵媚妝扮好怪。
著名星級造型師郭慶彬（Ricky）曾遠赴米蘭與巴黎時裝周，出席品牌有Max Mara、Sportmax、Chanel、Valentino、Gucci與Jean Paul Gaultier等品牌，也曾被邀在中國時尚節目《美麗俏佳人》擔任嘉賓主持，現於電台擔任客席嘉賓大談時裝之道與配搭技巧，近年也被各大品牌邀請客串造型顧門，為VIP提供服飾資訊與配搭技巧。Ricky曾為李冰冰、吳君如與張惠妹等擔任造型師，地位被肯定。