超雲超蓮美腿雙輝賀賭王92歲
昨日是賭王何鴻燊92歲的農曆生日，一如以往由三房為他假珍寶海鮮舫設宴賀壽，三房兩名索千金何超雲及何超蓮更無懼寒風，齊齊露腿上陣，認真養眼。
本月25日生日的賭王何鴻燊已分別由大房、二房及四房為他賀壽，昨晚農曆生日就輪到三房，三太陳婉珍假位於香港仔的珍寶海鮮舫筵開十六圍，全家總動員出動，三太、女兒超蓮及兒子猷啟襯到絕以紅色到場，長女超雲則穿黑金色裙突圍。
約晚上七時十五分，賭王與三太由三房寓所乘車前往海鮮舫，賭王身穿紅色厚重大衣在十多名保安及工作人員護送下落車。由於昨日氣溫急降，只有16度，加上現場非常大風，三太為免賭王着涼，向現場半百傳媒表示上船先影相。賭王做足防寒措施包到實，不過，超雲與超蓮就大晒長腿，超蓮身穿紅色連身短裙，超雲就更搏以背心短裙上陣，加上超雲清減不少，索到爆燈。
吳克羣有送祝福
超蓮祝賭王生日快樂，日日開心及身體健康，她透露買了保暖衣物及水晶雞送給肖雞的賭王，問她是否由外國買？她說：「唔知，我啱啱喺英國返嚟，係媽咪買咗，問我哋好唔好。」提到超蓮會與緋聞男友吳克羣在東華籌款中合唱，超蓮澄清：「唔係合唱。（有冇請教吳克羣？）冇，我請教G.E.M.。（吳克羣有冇祝賭王生日快樂？）有，所有朋友都有。」問到吳克羣是否已見過家長？超蓮不知如何回答，幸得身旁的孖生弟弟猷啟為她解圍說：「今日係爸爸生日，愛情緋聞唔好講。」問超蓮是否返港後，不再回英國工作？她坦言：「半年合約啱啱完，有個小休，但仲諗緊。」
文：名人組
攝：追蹤組