魔鬼胸蔚雨芯 性感為夢想

網民負評 一笑置之

龍：Rainky，其實你知唔知喺我仲蒙住面嘅時候，你係第一個見我真身同我食飯嘅歌手。

蔚：真係o架？你知唔知當時同你食飯，我對眼離唔開你個樣。我心諗，嘩！乜咁靚女嘅！啲皮膚又白又滑，蒙住面真係嘥晒呀！

蔚雨芯笑言龍小菌當年蒙面示人，非常嘥料。

蔚雨芯食得鹹魚抵得渴，不介意晒「魔鬼胸」增加曝光率。

龍：咁我知你守得秘密先敢見你啫，其實我哋好有緣。做新人嘅時候，每逢出席樂壇頒獎都被編埋一齊坐，你仲係咁催我快啲除罩添。

當年蔚雨芯極力鼓勵小菌除罩。	蔚雨芯教龍小菌擺甫士，一齊背向鏡頭手指指。	放大圖片
龍小菌細心地幫蔚雨芯整理秀髮。

蔚：咁成晚流流長，點都要吹吓水嘅。嗰時你仲自爆話就嚟要「脫」，搞到我都勁緊張！

龍：其實我哋兩個嘅形象都幾有趣，我就包到冚，你就唔介意展露美態。

蔚：我覺得做得呢一行，要食得鹹魚抵得渴，我唔介意騷性感增加曝光率，不過有時會有啲不實報道對我有影響，咁我惟有改變自己嘅態度，當係幫我宣傳囉。

龍：有啲人話你賣弄性感，其實佢哋只係睇到你一面，根本唔知性感背後係為咗夢想。

蔚：正如你蒙住面，網上啲人都會對你有負面評語，get唔到唔好以貌取人呢個point一樣。

龍：哈哈，我以前會好介意啲網民對我講啲乜，但依家學識睇開啲。

蔚：我試過上網search自己個名添，都幾搞笑o架！

拒爛桃花 期待真愛

蔚：我一直都好努力，希望等多啲人認識我，我唔希望自己獨沽一味（指性感），就算辛苦啲，都唔介意歌影視三棲。正如小菌你又教書又唱歌，又要拍廣告一樣。

龍：所以我話你同工作拍拖真係冇錯，你事業心真係好重。

蔚：其實自己都有男仔追嘅，但硬係冇嗰種Mr. Right嘅感覺。相士話過我要廿五歲後先拍拖，依家嗰啲都係爛桃花嚟o架！

龍：咁你有冇啲咩擇偶條件呢？

蔚：嗯……條件又冇嘅，但最少要識夠一年先可以開始囉。同埋如果我feel到對方對我有意思，我會更加唔想同佢接觸。成日都係我講，咁你呢？

龍：我？我自己都想拍拖o架！不過自己拍親都好短時間，拍得唔長久。可能因為每次都希望搵到結婚對象，所以搞到成件事都好複雜！

蔚：咁你每次分手都會好hurt？

龍：係o架！試過大學趕功課嘅季節分手，我去搵教授問功課嘅時候忍唔住喊。

蔚：等我幫你物色吓啦！你鍾意邊類型嘅男仔呢？

龍：我覺得兩性相處係一種學習，我期望喺對方身上學到嘢，所以大我十年都冇所謂。

保持體態 放棄零食

蔚：我知你以前係大肥妹嚟嘅，但依家咁fit，其實你點保持體態o既呢？

龍：自從開始減肥後，我就謝絕零食。我以前可以一個人食晒雙黃白蓮蓉月餅，再吞多一桶雪糕，食量驚人。

蔚：我都唔弱o架，我一食雪糕就停唔到口。

龍：咁犀利？其實除咗控制飲食，做運動都好緊要。雖然唔係想練到好似張家輝咁大隻，但係如果有啲腹肌嘅話都幾吸引。

蔚：咁你到時可以騷body啦！

龍：吓？唔好啦，我唔慣擺甫士o架！

後記：chok甫士默契十足

本以為初出道以包到實形象示人的小菌，與經常晒魔鬼身材的Rainky應該大攬扯唔埋，即使兩人的感情觀或工作都是南轅北轍，但一埋位影相時，蔚雨芯化身「甫士王」教小菌擺出誘人姿勢，小菌亦幫Rainky整理髮型，足證二人感情要好。二人影合照時亦自動波，毋須攝影師指導，已能默契十足chok出不同花款的甫士，十足筷子姊妹花。

文：安震東

攝：李柏儒

場地：紅磡都會海逸酒店