祖兒捉師兄禁室培「肉」

容祖兒昨日與「軟硬」葛民輝和林海峰出席慈善跑開步禮，祖兒為12月個唱勤於收身，健身教練每日只准她吃雞胸及蛋白，她謂：「係食飽，但唔好味囉！」祖兒笑言教練好嚴厲，密集式訓練令她以為自己去考警察或飛虎隊。問到男友「師兄」劉浩龍可有陪訓練？祖兒謂：「都好感激佢，唔使覺得係孤伶伶應戰咁，佢都會陪我食雞胸，所以一出街我就好想食嘢，因每日似禁室培肉，係培訓『肌肉』。」軟硬將於明年1月23日紅館開騷，已加開農曆年初一最後一場，問到會否再加場？林海峰笑言：「不如加開喺機場，方便新年大家去旅行。」