Kary光豬烈女裸彩自救

吳雨霏(Kary)早前與余文樂分手,無仔一身輕的Kary最近出新碟,決定以烈女形象,進行性感解放四部曲,首先出動「孤單北半球」大晒波邊,更學名模姬摩絲(Kate Moss)半裸抱胸「裸」景贈興,誓要用誘人Body向舊愛示威。而Kary表示這次出碟亦拯救了自己,令她放低包袱,回復光彩。

吳雨霏今年六月宣布與余文樂戀情告吹,經歷約五個月的治傷期,Kary終於走出情傷低谷,並會在月底推出大碟及舉行音樂會。

回復單身後,Kary明顯無後顧之憂,在新碟造型上徹底大解放,除了剪短煩惱絲外,更轉型做性感Rock妹,以一身全黑打扮,真空穿上型格皮褸,大晒事業線,而下身只着上激短熱褲。

晒玉腿香肩

至於第二款造型照,一頭濕髮的Kary半裸上陣,似模仿國際名模姬摩絲擺過的甫士,交叉雙手抱胸向鏡頭放電。騷完上半身,又怎少得Kary的一對招牌長腿,她穿上跌膊緊身衣坐枱咬手指,乘機大騷玉腿及香肩,又用修長雙腳夾着枱腳。Kary今次瞓身一脫出動全身「武器」,似乎要證明舊愛走寶。

曾迷失方向

Kary亦坦言今次首張全創作新碟紀錄了自己過去一年來的少女心事:「係我一年以來嘅心境變化,曾經迷失過方向,睇唔到出路,好介意人哋對我好嘅、壞嘅一字一句,所以好大壓力。當中好多顧慮同包袱都變成自己最大敵人。」她又指今次出大碟亦成功自我拯救,並相信只要坦誠面對最脆弱的自己,一切的好與壞總會過去。

文:音樂組