黎瑞恩未想囡囡識男友

歌手黎瑞恩（小恩子）昨日到電台宣傳馬天尼娛樂舉辦的「金至尊珠寶呈獻黎瑞恩ALL FOR LOVE慈善演唱會2013」，慈善騷將於11月29及30日假會展舉行。小恩子稱完騷後會全職湊女，希望趁囡囡在反叛期前可以多談少女心事，小恩子又自爆：「細個就同佢講，有男性朋友唔緊要，但唔好有男朋友住。」她又笑言嫌囡囡太曳，開騷時不敢帶她上台玩。