阿佘風騷失手 遭睇穿墊術
向來有「打底王」之稱的佘詩曼昨日正式重投無綫，打扮性感的她到銅鑼灣出席活動時卻打爛齋缽，tube dress下滑露出nude bra，認真老貓燒鬚。
佘詩曼重投娘家無綫發展大中華市場而開設的上海翡翠東方傳播有限公司（TVBC）新合約昨日正式生效，下午她穿性感tube dress到銅鑼灣出席Rado瑞士雷達表活動，阿佘在台上表現風騷，但tube dress明顯鬆身下滑，雖然阿佘經常整理，但最終百密一疏，右胸露出半個nude bra及防走光膠紙。向來「防守嚴密」的阿佘受訪時對走光懵然不知：「Oh No！求吓你唔好出，唔好害咗我個打底王，幫我打啲星星、心心格仔落去啦。」她又說：「條裙好重，呢排又瘦咗，呢排好忙，屋企裝修緊。」
陳豪想追多個女
提到無綫今年台慶頒獎禮繼續玩「公投」，但加插專業評判分數，問阿佘可覺此舉會令賽果不公？她說：「我今年冇劇，下年先算啦，可能到時又改制啫，其實只要做得好就會贏，咁當然全民投票就最好啦。」提到林峯拍巡禮劇《使徒行者》不見她開工感失望，阿佘笑說：「佢成日都扮唔開心，我又唔係BB，工作等公司安排啦，會大陸、香港兩邊走。」
阿佘隨後換上另一套露背短裙與陳豪出席Rado旗艦店剪綵活動，品牌高層送贈價值89,000元的名錶給阿佘，為她佩戴手錶後更輕吻手背，令阿佘心花怒放；陳豪則獲贈28,500元的名錶。陳豪表示兒子的名字仍在構思中，並透露最初得知老婆佗仔的心情：「知道係仔就想係女，父母心情就係咁矛盾，希望追多個女，慢慢嚟啦。」並稱未感受到為兒子撲學位的壓力。陳豪又指有客戶斟洽他與老婆陳茵媺夫妻檔出席活動，問價錢是否加倍？他笑言不清楚，交由經理人洽談。
文：影視組