林國斌共枕三年 不歸家就絕食
已故歌手梅艷芳（阿梅）逝世十周年，一直被指為「阿梅舊愛」的林國斌（Ben）終於打破沉默接受訪問。與阿梅同襟共枕三年，其實是有實無名的夫妻，遺憾是兩人年少輕狂，沒料人生苦短，錯過了共度餘生的機會。
出走日子決離舞台
Ben受訪時坦言：「我猶豫咗兩日，最怕畀人覺得我藉舊情自我宣傳，反覆思量，畢竟是十年往事，我應該用一種方式表態，當是對阿梅一種懷念。」他無限唏噓憶述說：「我哋係1985至1986年間相識，1990年同居，1993年分手，阿梅係一個心地好、有義氣嘅女仔，我哋曾住喺陽明山莊，試過有一晚，返家途中，後面有車爬我頭仲豎中指，即時落車理論，對方走出兩個6呎幾高醉老外，我回頭望阿梅，佢已經喺車上攞咗支壘球棍出嚟，老外見佢劍拔弩張，即時閃番上車，當時我暗讚阿梅一句：『好嘢！真夠薑』，我認識嘅佢，真係一個唔怕死嘅人。」
Ben坦言阿梅有一招絕招，他不得不立即投降，就是「絕食」，只要Ben不回家，她可以絕食2日。自從發生卡拉OK掌摑事件，影圈即時揭起前所未有的血雨腥風，阿梅無辜捲入江湖追殺令，Ben陪伴她游走他方，這半年是兩人最甜蜜的日子，阿梅決意離開舞台，兩人並計劃好共度一生。他說：「問我哋點解會分手？有段時間，大家為好小事嘈一大場，好傷，好驚傷害對方，我搬返自己屋企，終日花天酒地，有晚，獨在家中，對住幾隻狗，四幅牆，我眼角竟然滲淚，我寧願有人同我鬧交。」Ben早知阿梅有病，在她家姐（梅愛芳）離世時，她想重修舊好，可惜當時他已經有女朋友。
「估唔到結局會咁」
「到今日，我好內疚，如果佢係我女朋友，我會同佢去睇醫生，但當時往事已矣，喺佢死前一個月，我聯絡佢唔到，直至有朋友話畀我聽，阿梅喺醫院，我趕到去，想見佢一面，可惜佢昏迷已久，見唔到佢最後一面，我點都估唔到，個結局會係咁！」
文：影視組