小齊踩車行善 怕缺氧
任賢齊昨日一身單車手裝出席活動，月尾他將到內地青海省玉樹縣四千多米高海拔地區，騎行50公里，並將500部單車送到多間山區小學。首次到山區踩單車的小齊坦言有啲驚︰「我有位車手嘅朋友去過西藏有高山反應，之後變咗肺水腫，仲死喺高山度，所以要小心啲。醫生話我體能應該好快適應到，係要小心瞓覺，可能會瞓瞓吓頭暈，叫我帶定啲氧氣，千祈唔好死頂。」
操fit自己
小齊又指以往試過到高海拔地方拍武打戲︰「四千幾米都幾恐怖，初初去到其實我冇乜感覺，見到武師仲奇怪做咩全部瞓低晒嘅，點知我踢咗兩腳就同佢哋一齊瞓低咗，因為吸唔到氧氣。所以到高山地方動作盡量慢啲慢啲，慢慢適應。」小齊現時日日踩單車操fit自己，免得家人擔心。
提到吳尊日前自爆已婚兼育有一女，小齊坦言與對方不太熟，但仍送上祝福，並笑言：「佢唔係好後生咋咩？（有埋第二胎喇！）咁趕進度？不過係好事，佢自己講，代表佢好喜歡生命到來。」
文：音樂組