謝安琪拋半球挑戰色迷
謝安琪（Kay）慨嘆在這個時代，不少男性會戴上有「色」眼鏡看女性的胴體美，故在新碟決意為女性發聲，挑戰性感極限，「無添加」露半球測試男網民的色迷迷指數，誓要綻放出最美一面來撥亂反正。
謝安琪在同名國語新碟中以女性角度看世界，她說：「好多歌都係自己內心故事，為女仔心靈上打打氣，社會對女性好多標準同傳統枷鎖，我哋每個人都要勇敢活出自己人生。」所以在新碟一系列形象照中，Kay舞動裙襬展現各種花的形態來比喻女性美：「前面每張相都表達唔同綻放嘅美態，最後張相企定定，其實係靜靜等人了解佢內心。」
胴體文化好氾濫
Kay在壓軸登場的相片中選擇以deep V上陣，拋出誘人「八字波」，原來在拍攝前她仍心大心細，經商量後決定真空上陣，皆因想測試自己性感底線：「相中嘅我係個坦然嘅女仔，如果張相係騷女人身材，我都揀第二個甫士、或着番啲push up啦。依家網上好易搵到女仔展露自己胴體美嘅相，呢種文化好氾濫，令到好多人一開始就會用色迷迷角度去睇女仔，其實一個女性唔應該畀人用咁嘅眼光去睇，我都挑戰自己，究竟其他人睇唔睇到我其他嘅美態呢？」
信老公藝術眼光
sexy程度爆燈，自然會引起部分男網民無限色迷迷的幻想，可是Kay卻絕不擔心：「因為呢個社會真係有咁多人係咁，呢個係值得思考嘅問題，我唔會干預佢哋，因為咁樣就代表咗佢係一個點嘅人。」 問到老公張繼聰可會呷醋？Kay笑言：「佢欣賞我當然唔止咁單層次嘅美態，我對佢嘅藝術眼光好有信心，佢覺得呢張相好靚呀。」
化妝：Khaki Yan
髮型：Chris@Queen's private i salon
服裝：voga@Taipo Plaza HK
文：音樂組