子珊錫身拒露肉擔抬免問
無綫一線花旦徐子珊昨在荃灣宣傳新劇，玩遊戲時卻以穿短裙為由，拒絕被抬起，非常錫身，最後要由楊愛瑾頂上。劇中的子珊在多場爆炸場面都「炸極唔死」，被網友封為「不死狂人」，但子珊坦言感到不快：「好無奈觀眾接受唔到！」
藝人徐子珊、岑麗香、張致恒（Steven）等，昨出席活動宣傳劇集《神鎗狙擊》，眾藝人在台上大玩遊戲，但當子珊被要求由兩名男藝人抬起投籃時，她以身穿短裙為由耍手擰頭，頻頻嗌「唔得」，再謂：「好危險喎！」最後要由穿短褲的楊愛瑾頂上，Steven則不避嫌跟魏焌皓齊齊抬起緋聞女友香香。
無奈觀眾難接受
子珊在《神》劇中甚多動作場面，但所有爆炸場面皆能化險為夷，炸極唔死，而被網友封為「不死狂人」，還將所有炸彈鏡頭整合成短片，將《神》劇變「神劇」，非常搞笑，不過子珊聞言就唔識笑，更因觀眾未能接受劇情而大嘆無奈：「有少少唔開心，咁辛苦拍套戲出嚟，同埋我都有做足research、參考外國劇，觀眾接受唔到好無奈，希望佢哋慢慢再接受創新嘅劇情啦！」至於造型方面亦成為網友熱話，她稱曾與監製及導演討論：「我有朋友做Madam，佢做嘢嘅時候都有着高踭鞋，我哋都係為咗視覺效果，希望觀眾諒解我哋啦！（下次着三點式？）我呢啲老人家，留番畀後生女啦！怕嚇親觀眾，驚到時投訴仲多，會爆標！」
Steven香香大方
Steven和香香日前被拍到拖手戲份而傳緋聞，兩人均否認傳聞並大方合照，香香笑言預咗：「我哋仲着住戲服，證明做得成功，當做宣傳。」Steven還拖香香另一緋聞男友溫家偉落水：「我同佢先係一對！佢今日冇嚟有啲掛住佢！」
文：影視組