薛家燕恨開個人展
薛家燕、糖妹（黃山怡）、張達明等前晚到紅館出席一個文藝晚會，一身「紅戰士」look現身的家燕姐在台上和「o靚妹版」的自己玩隔空對話，又載歌載舞大唱金曲。家燕姐受訪時表示特別為晚會訂造戰衣，問到她可有意開個人展？她說：「都有人搵過我，之前見莫文蔚個展啲嘢好靚，自己都想開，好似以前攞過啲十大明星嘅獎，但有啲甩皮甩骨，不過要有時間先得，我依家未有時間。」
而正為無綫拍劇的糖妹被指頻頻NG累街坊，她澄清說：「冇乜點NG呀，好多時喊戲需要啲時間培養，不過好在去到後尾我哋大家都好friend，幾時都做到，3、4次唔算多啩？」另戰勝癌魔的張達明首度復工擔任司儀，身穿型仔西裝的他精神似乎不俗。