渡邊麻友踩入旺角 森美索吻遭噓爆
日本偶像組合AKB48的女神級成員渡邊麻友，昨日率領十數名工作人員展開香港之行。首次訪港的麻友吸引大批宅男粉絲傾巢而出，她到埗後即殺入旺角商場，向數百支持者發功賣萌，大會司儀森美卻唔識死向女神索吻，結果換來全場噓聲。
當紅組合AKB48威盡日本藝能界，主將渡邊麻友的玉女形象，早已屬宅男心目中的頭號女神，就連本地亦有食店起用她擔任代言人吸客，令其本地粉絲人數大增，昨日首度訪港即引起哄動。
昨日中午，麻友率領為數十多人的團隊現身香港機場，首度來港的她吸引半百粉絲接機，當中以男性居多，亦不乏Cosplay成偶像在猜拳大會中的動漫人物造型。
場面混亂 處變不驚
以可愛形象見稱的麻友身穿連身裙抵埗，在大批保安築成的人鏈保護下走向專車，雖然粉絲一擁而上場面混亂，途中亦有旅客湊熱鬧影埋一份，見慣大場面的她卻處變不驚，全程報以甜笑親切揮手，又應粉絲要求一起做招牌Pat Pat手勢，當接過粉絲送上的禮物及打氣紙板，麻友笑言十分開心。
及至下午，麻友殺入旺角朗豪坊出席代言活動，吸引逾500名fans圍觀，大會先安排6名可愛的小妹妹扮成「小麻友」出場，並跳舞為現場炒熱氣氛。當麻友甫出場即尖叫聲不絕，她又用廣東話打招呼冧粉絲：「大家好，我係渡邊麻友！」
寸嘴網民：「唔影腳？」
台上，麻友跟小朋友和fans大玩遊戲，擔任大會司儀的森美不改口花花作風，他笑問：「你哋可唔可以叫麻友錫我一啖？」此舉即觸動fans神經，台下觀眾向他報以噓聲，森美還唔識死笑笑口再叫麻友餵他吃壽司，令現場噓聲傳個不停，麻友最後有向小朋友餵食壽司。事後，森美在Instagram上載麻友照片，又留言大讚純真，被指有戀足癖的他遭網友問：「唔影腳？」更有人寸爆指麻友做得森美個女。
麻友在活動上接受訪問時高興稱：「冇預過機場同現場都有咁多fans。（想食咩美食？）未必有時間，都想去飲茶。」她又透露來港前有向隊友探路，得知港迷很友善，不過她就不太認識香港藝人，但有機會也想合作。
Profile
年僅19歲的渡邊麻友自幼已表演欲旺盛，雖然於2002年參加AKB48的第2期新成員招募賽事中落敗，但同年卻在第3期招募賽中脫穎而出，加入組合更獲力捧，憑住其清純外形，得廣大宅男壓倒性力撐。近年，渡邊麻友在「AKB人氣總選」中支持率甚高，直逼大島優子和指原莉乃，有望能登上一姐寶座，更連續兩年打入總選的人氣三甲。
出生日期：1994年3月26日
出生地：埼玉縣
血型：AB型
三圍：28、22、32
文：外娛組