羅金榮街頭文化登堂入室
近年香港的街頭表演文化愈來愈興盛，尤其旺角行人專用區更加熱鬧，可是在百花齊放的背後，表演者原來極之難撈，多年表演經驗的羅金榮就大呻曾被恐嚇兼趕走，如今獲製作人孫敬安賞識，有幸舉行室內演唱會，實在難得！
製作人孫敬安即將於九月尾，聯同街頭表演者羅金榮（Wing）、MR.FUNNY、樂隊Unknown及The Flame在西灣河舉行演唱會，實行將街頭表演文化重新包裝，搬上大舞台呈現。
在旺角街頭表演多年的阿Wing，憑翻唱黃子華的《藍天》而為人知曉，其表演片段亦曾在網上廣傳，難得有人欣賞，阿Wing卻在2011年毅然退下來，他大呻：「擺街檔一定試過同其他表演者嗌霎，皆因中間嗰截行人專用區係最有利嘅位置，自然成為必爭之地，試過有個藝術團體走埋嚟兇我，話要收我錢，你咁大棚人，我可以點？」
在旁的Unknown成員Vincent亦慨嘆在港搞街頭表演相當難撈，他直言：「曾經喺尖沙咀碼頭表演，畀市民投訴太嘈，最後仲報埋警，畀警員要求離開。」問到家人可曾擔心他們「搞到上差館」？成員DNA話：「幸好家人冇乜意見，只要開心就得，但真係好難做。」
搞搞新意思
正因如此，一向為歌手統籌演唱會的孫敬安今次就大玩新意思，幫一班年輕街頭表演者搞演唱會，他說：「佢哋係我親自落區物色，所以水準一定有番咁上下，我希望可以幫佢哋搬入大舞台繼續表演，等大家睇得舒服啲。」孫敬安又指今次演唱會所籌到的收益，會用作下一次的演唱會之用，希望該計劃能愈搞愈大，得到更多市民及街頭表演者的支持。
文：音樂組