王梓軒操肌fit過飛虎

歌手王梓軒近日踩過界，早前不只參與舞台劇及電影，近期更加入公仔箱拍攝電視劇，不過他都未有放棄最愛的音樂事業，日前他就在商場內完成史無前人的創舉，他說:「成個騷好似演唱會咁，有燈光、音響同200幾個dancers，好少會放咁多資源喺個藝術節度，算係一個突破，我負責打頭陣加壓軸，同埋首次親自設計長達30分鐘，有200幾人嘅快閃表演。」

捱夜傷聲帶

他表示因近日經常拍劇捱夜而影響聲帶：「因為同時開緊3個唔同節目，一個係《反斗普通話》、清談節目《兄弟幫》同劇集《飛虎Ⅱ》。（精神分裂？）有時會難抽離，其實反斗普通話要好搞笑、好諧趣，自己要好調皮，清談節目《兄弟幫》都係，而且冇稿，要好高專注力去自由發揮，而飛虎就係演奸角，都好有挑戰性。」

「乸」傷頭皮

問到要否為劇集操肌時，他說：「Train咗個幾月，因為劇情入面講我係fit過飛虎。（要騷肌？）會愈着愈少囉，唔會除晒。」他又表示因角色要漂藍色頭髮，而導致頭皮受損，他說：「係第一次漂到咁白，『乸』傷咗頭皮，因為隻藍色一個禮拜就甩，但都唔敢染，之後啲顏色都係噴上去。」

場地：沙田新城市廣場

化妝：Ranson Lau@ Beauty Tech

服裝：Diesel、John Hardy

文：影視組