肥媽 陳潔靈「婆媳」大戰搬上台
瑪利亞（肥媽）、陳潔靈（Elisa）與葉麗儀（Frances）聯手開騷，卻鬧出「三大巨肺鬥氣」的不和是非，肥媽以爛gag力證姊妹情不變，更笑言要為Elisa與寶貝仔拉紅線，由好友變新抱，在紅館上演一場「斬崩刀劈扭紋柴」的婆媳大戰。
三位殿堂級天后陳潔靈、肥媽及葉麗儀再度攜手於10月5、6日假紅館舉行「3個女人一個墟2013唱過界演唱會」，不過三位阿姐未鬥歌喉先鬥氣，有傳肥媽因不滿海報排位及被紅衫Frances搶鏡而在記者會甩底，肥媽解釋當日因生意出問題而缺席，更自言是「紅顏」禍水：「我試過一着紅衫就無端端哮喘入醫院，我唔信邪再着多次，第二次就喺屋企門口仆親，所以呢十幾年嚟都唔着紅色衫。」Elisa則對是非一於少理，她說：「唓！呢個一早都估到會傳，你估仲係細路仔玩泥沙咩？我哋都咁大個人囉。」
唔准搶老公
一向性格鬼馬的肥媽更索性以打牌比喻不和是非：「不和？係唔和（局）o架啦，我幾大都冧莊落去啦！」在旁的Elisa即取笑她說：「好爛gag呀，係我哋先明咋，Frances聽到都唔會明。」
肥媽笑言若好姊妹搭上老公的話，便會真反面鬧大交：「如果我老公錫你咁就要不和，但佢（Elisa）口味輕咗好多，佢呢排要溝我個仔呀，要做我新抱，即係我係譚蘭卿，佢係鄧碧雲，變咗斬崩刀劈扭紋柴，有排鬥呀。」笑得合不攏嘴的Elisa更提議將這場「婆媳大戰」搬上舞台：「呢壇嘢可以一路做落去，我孭晒金豬上台，叫Frances做和事老。」
享盡兒孫樂
而肥媽更承諾完成今次個唱後便會退出個人生意，專心唱歌及享盡兒孫樂：「早幾年掛住搞生意，冇理到我啲朋友，今次我買咗200張飛請佢哋睇個唱，上台同佢哋講對唔住。之後同我老公都唔再做生意，專心等大孫拍拖，話唔定我好快會做太嫲、太婆呢。」
文：音樂組