霍啟剛湊仔做到足 晶晶冇得「鵝」
剛為人父的霍啟剛，最近忙「青聯」活動又要忙湊仔，但仍自得其樂，笑言換尿片沖涼樣樣做，為免老婆秋後算帳，「鵝」足一世。啟剛更言就算兒仔阻礙他工作，完全沒有感到煩厭，果然有仔萬事足。
霍啟剛與郭晶晶的愛兒上月廿七日出世，啟剛忙公又忙私。昨晚青年聯會就職禮活動，身為主席的霍啟剛一早到場招呼賓客，被問到是否已習慣做父親？一提起兒子他即眉飛色舞：「都習慣，但都係一個星期，覺得好有挑戰性，不過要慢慢上手，好開心，好奇妙。（有冇幫手換尿片及沖涼？）呢啲一定要做，如果唔係老婆會講一世。（有冇雞手鴨腳？）冇，但緊張啲，新生BB頸好脆弱，喺醫院有學過，但返屋企做又唔知啱唔啱。」至於會否擺滿月酒或百日宴？他謂還未清楚：「其實都係家人食餐飯，幾時食都得，滿月百日都得。」
每日為BB拍照留念
另外又透露BB還未改名，因爹哋霍震霆不在港，但已知要在一個月內改，會加緊催促爹哋。啟剛繼自爆昨日在家中為今次活動寫講辭時，被在旁的兒子突然喊聲打斷，但完全不覺煩厭，他說：「我寫咗一半，阿仔喊就要停低氹佢，但好奇妙，原來自己BB喊唔會覺得煩。」另外，他又表示媽咪朱玲玲每日均有為BB拍照留念，他說：「小朋友個樣日日都變，要每日影，日日要記錄低。」
薛嘉麟陪妻食發福
而青聯副秘書長薛嘉麟獨自到場，他透露太太諸葛紫岐現時在加拿大安胎，預產期是蛇年，賣關子不願透露是男嬰還是女嬰，至於鍾意仔定女？他笑着說：「最鍾意我太太。（有乜獎勵太太？）呢段時間好辛苦，先體諒做父母嘅辛苦，我除咗獎勵太太，都想獎勵我媽媽。」薛嘉麟身形比早前發福不小，他指因陪太太一起吃東西：「老婆最近胃口轉變，以前唔吃魚，依家突然愛上魚。」繼又謂會請教剛榮升父親的霍啟剛意見。問到他有否收看與胞兄薛世恒分手的陳法拉主演的《衝上雲霄II》？他鬼馬地說：「一陣先。」同場還有近期新聞人物盛品儒，他低調入場，一早表明不受訪。
文：名人組