馬詩慧出動家規逼女戒煙
名模馬詩慧（Janet）的大女王曼喜多次被拍得當街食煙，Janet多番勸喻仍未見效，前晚她出席活動時，再度發功，直指王家有家規，希望女兒能夠早日戒煙成功；提到女兒投身社會有否畀家用？Janet即時鬼馬O嘴，直言女兒不用向她要錢已經安樂晒。
昨日一眾名模包括Janet、Ana R.、Jocelyn、楊崢和陳嘉容出席意大利高級珠寶品牌BVLGARI珠寶預展，育有三名子女的Janet，透露兩子女經已開學，而大女王曼喜則正在外國度假，之後便會返marketing新工，問到大女會否轉做模特兒？「佢係全家最矮，雖然身材比例唔錯，如果有合適嘅model工作都冇所謂，依家份工係長遠嘅，有人教到嘢點解唔做？（女有冇畀家用？）我係咪要0嘴？佢又唔係搵得多，佢自己要使要用，畀咗我，到時又問我攞番，咪費時失事，佢依家出嚟做嘢，唔使問我攞錢已安樂晒，可以養少個。」
母女關係未受影響
對於女兒食煙的問題，她續說：「我覺得要乖，同唔好食煙。（食煙有冇令你哋兩個關係決裂？）冇，唔可以話食（煙）就係壞人，但冇必要，國有國法，家有家規，希望佢唔好食煙，其他冇所謂，最緊要開心。」
Jocelyn想買樓收租
同場Jocelyn獨自性感出席，她透露夫婿Anthony正忙於他們的醫療健康中心業務，又表示生意愈做愈好，問他倆是否賺很多錢？「唔係，要儲定畀將來BB，（喺香港買樓？）有諗過，但如果生完BB我哋會返夏威夷，所以仲諗緊，但係香港係一個好嘅投資地方，都想買樓放租。」另外，早前傳出已答應男友求婚的Ana R.，仍然堅稱男友尚未求婚，更表示期待自己十月生日時男友向她求婚，不過Ana雖然未婚，但她已考慮為將來的BB購下保險。
文：名人組