近期力谷新碟的百變天后Lady GaGa，前晚為音樂節表演，繼續以騎呢造型示人的她，邊揮刀邊唱歌，更大講「性經」，被網民狠批危險兼教壞細路！
月前因接受臀部手術而全面停工的GaGa，前晚於倫敦北部為iTunes音樂節擔任表演嘉賓，為傷愈後首個海外演出。為力谷於11月推出的新碟《ARTPOP》，GaGa落力唱足一個鐘頭，期間又換上多個造型，令全場三千名觀眾High爆。當晚GaGa以全黑蒙面忍者Look現身，躺在一黑色鐵籠內出場，獻唱未曝光新歌《Aura》，不過GaGa邊唱歌邊揮動着一把寫上「Hollywood」的短刀，而被Twitter網民抨擊，有人留言稱：「邊個畀佢表演嗰陣拎把刀出嚟？」，亦有人指之前GaGa開騷時曾用咪扑爆粉絲牙齒，但她未有吸取教訓揸刀上台，此舉非常危險！
全晚GaGa共唱出7首新碟歌曲，包括《Swine》及《ARTPOP》等，幾乎每首歌都轉造型，當中以貝殼比堅尼最搶眼，大騷事業線及Pat Pat。事隔半年再出山的GaGa，向粉絲稱「冇咗你哋我生存唔到」，獻唱《Sex Dreams》時，又叫粉絲跟她一起脫掉假髮，之後忽然於台上大講「性經」，吹水吹足3分鐘。最騎呢莫過於介紹新歌《Manicure》時搞爛Gag話：「對唔住，我唔記得咗去修腳甲，但我有去整指甲！」
至於另一天后Beyonce前日於Made In America音樂節演出時疑似走光露出下體，當日同場仲有Beyonce妹妹Solange Knowles及饒舌歌手ASAP Rocky等。
文：外娛組