倫永亮作打牌歌氹掂仙姐
音樂才子倫永亮個唱尾場獲眾多圈中好友到場，即場作曲填詞的他大膽地擺白雪仙上枱，以對方名字創出一首「打牌歌」，氹得仙姐眉開眼笑。自掏荷包捧場的葉德嫻，追問倫永亮是否送飛給前一晚到場的張繼聰夫婦，認真搞笑。
倫永亮（Anthony）前晚在伊館舉行《倫永亮ONE VOICE TEN FINGERS演唱會》尾場，多位圈中分量級好友現身撐場，包括白雪仙、陳寶珠、葉德嫻、陳潔靈、劉雅麗等。Anthony在台上盡顯幽默本色，以歌迷提出的「今晚開枱」為題，即場作曲和填詞，並大膽地拉仙姐落水：「今晚心情很不佳，突然接到仙姐電話，話今晚開枱！」氹得台下的仙姐笑逐顏開。
陳潔靈病到嘔屎
個唱尾聲時，Anthony捉了陳潔靈上台做嘉賓，病到沙聲的陳潔靈說：「我病到死死吓都躝嚟睇你啊！」Anthony即說：「佢尋晚連玉置浩二都冇睇，病到嘔屎都嚟睇我啊！」陳潔靈作狀打他說：「做咩話我嘔屎啊？不過你個騷我只有一個字畀你，respect（尊敬）！」之後他又拉葉德嫻上台合唱，葉德嫻一上台便拿出演唱會飛說：「倫生，我自己買飛o架！」Anthony即讚：「你真係有taste，尋晚嗰場冇咩自己友捧場，得謝安琪同張繼聰。」葉德嫻問：「佢哋有冇買飛先？」然後搞笑地反白眼和搖頭嘆氣，並指兩人抵打。
認賤想搞棟篤笑
完騷後，Anthony感激多方好友前來撐場，並繼續發揮搞笑本色說：「不過咁即係送咗好多飛出去啦？希望主辦單位唔使蝕錢！」他又稱有意舉行棟篤笑：「好似第一晚我教改編林憶蓮隻《燒》做淫賤版，其實我都幾賤，不過又幾好笑。」
文：音樂組