阿Sa難拍拖睇戲怨男友似移民
杜汶澤與蔡卓妍（阿Sa）以「黑白雙煞」造型出席英皇電影《超級經理人》的盛大首映禮，阿Sa大呻未能與男友陳偉霆一齊睇戲，對方似移民橫店，相信男友回港時電影已經落畫。
阿Sa、杜汶澤、張敬軒、泳兒、吳浩康、衛詩雅與英皇老闆楊受成等，昨晚出席英皇電影《超級經理人》在港舉行的盛大首映禮。穿白色Deep V透視裙到場的阿Sa騷長腿，非常誘人，與黑色造型的阿澤猶如「黑白隻煞」一樣，甚有氣勢。問阿Sa為何男友陳偉霆不到場支持？她說：「佢好似移民咗去橫店。（等佢返香港包場睇？）佢返嚟我諗套戲都落咗畫啦！（失望？）唔緊要，相信內地都有得睇。」
阿澤推o靚模入房
阿澤的太太田蕊妮亦未有到場，他指太太正在拍劇，若要化妝set頭的場合都盡量少出席。他說：「稍後我有部戲同周秀娜合作，有好多床戲。佢（田蕊妮）都講咗會嚟，近年佢好少睇我嘅戲，我都好少睇佢嘅劇，因為時間配合唔到。」
阿澤於戲中飾演一名收數佬，要搵欠債o靚模肉償，後來良心發現做了她們的經理人。他笑謂：「如果係真，我諗我係推o靚模入房嗰個。」他又指做經理人單憑抽佣難以發達，唯獨霍汶希旗下有謝霆鋒、容祖兒和Twins例外。對於亞洲電視不斷重播紀念盛品儒特輯，阿澤說：「我條命生得好，睇唔到。曹操都有知心友，佢（盛品儒）一定都有粉絲，政總集會當日都有幾十人啦！希望佢嘅離開係亞視步向光明嘅一日。」
文：影視組