晶晶誕7.26磅金叵羅
恭喜恭喜！已故全國政協副主席霍英東長孫、家族坐擁350億資產，現年34歲的霍啟剛與31歲的中國奧運跳水四金得主郭晶晶，首個愛情結晶品終於出世，昨日中午約12時半啟剛透過微博宣布晶晶昨早順利誕下男嬰，BB重3.3公斤（約7.26磅），去年11.11剛晶才大婚，照時間推算，估計剛晶洞房花燭夜便一擊即中。啟剛昨日未見露面，榮升爺爺的霍震霆卻精神充沛，抱完孫仔後，隨即返大陸向領導報喜訊。
萬眾期待的「剛晶B」昨早出世，由名醫梁淑德為她接生，半百傳媒守候在養和醫院門外採訪，至中午約12時半，啟剛終在微博宣布喜訊，他寫着：「親愛的朋友們，我和晶晶的兒子已經在今天早上出生了，體重3.3公斤，母子平安健康！小生命的順利誕生，我們感到非常開心，家人亦感到無比的喜悅！非常感謝醫護人員對我們的悉心照顧和關懷！我們衷心感謝各位傳媒朋友及親朋好友們的關心和祝福，稍後我們會向大家發送照片！祝大家生活愉快，身體健康！」消息一出，醫院門外氣氛即時升溫。
樣似剛晶混合體
至下午1時許，榮升爺爺的霍震霆穿着西裝結紅呔從醫院正門步出，並大方受訪，全程笑到四萬咁口，心情開心不已，霍生透露「剛晶B」於昨早出世，樣貌是啟剛和晶晶的混合體，體形屬「大隻仔」，至於晶晶是順產還是剖腹生產？霍生兩度迴避問題，答非所問說：「兩個都好健康，到時抖多1、2日，同大家分享經驗。」問到「剛晶B」改名未？他續說：「呢個係爺爺嘅任務，終身嘅，一定要審慎啲，（有idea未？）有，（跟族譜改名？）要適合，（心情如何？）呀！榮升爺爺啦，特別媽咪（曾祖母）最開心，（曾祖母見過曾孫未？）見過啦！頭髮都幾多呀！（你抱過孫仔未？）少少未熟手。」
霍生更即時做出抱BB的動作，認真風趣幽默。問到晶晶為霍家誕下男丁會否獎勵她？他說：「佢（啟剛）叫我代佢講：『你哋嘅同事咁多日咁辛苦，唔好意思。』啟剛都話自己無瞓幾日，抖下先同大家分享。（買禮物送畀孫仔未？）等佢（BB）都抖下先，見佢幾叻，擘下眼又瞓番，（會擺滿月酒嗎？）下次，我哋好民主，大家傾傾先！」離開醫院後，霍震霆即返大陸工作，他在電話中說:「我同領導食飯。」並再次表示待孫仔休息多點才會發相，錫孫錫到燶。
朱玲玲笑唔停口
記者致電榮升嫲嫲的朱玲玲，電話傳來開心笑聲，透露已見過孫仔，她說：「見完BB仲更加興奮，（晶晶係順產定開刀生？）留番佢哋自己講，晶晶好精神，（送乜畀孫仔？）會同佢哋商量，睇需要乜嘢。（你心情點？）開心囉。」並講笑說：「知道自己老囉！我爹哋見到曾外孫後，仲講咗句：『希望年年有今日』。」看來朱爸爸希望啟剛和晶晶將來繼續再生，開枝散葉。問到抱孫仔時可有回想當年抱着啟剛的感覺？朱玲玲笑說：「嗰時我得20歲，唔知發生乜事就做咗媽咪，睇番啟剛依家30幾歲做人爹哋，責任更加大咗。」約晚上8時許，朱玲玲再度現身醫院探望孫仔，說晶晶健康很好，又指孫仔樣子經常變，問她會否替孫仔改名，她笑說：「我中文好差，英文名都畀番佢哋自己改啦。」朱玲玲在醫院逗留約半小時離開。
文：名人組