蔡國威將續約林紫君搵後路
亞視獲通知7日內要撤銷高層盛品儒的所有職務，否則將會吊銷其廣播牌照，亞視至今遲遲未有反響，當事人「潛水」，而一眾藝員則繼續返公司上堂，當被追問敏感問題時，大部分藝人表示不擔心前景，蔡國威更力證公司冇拖糧，但林紫君和亢帥克開口表示要「搵人請」。
通訊事務管理局日前公開調查報告，指亞視主要投資者王征直接參與亞視運作，向亞視罰款100萬，以及勒令執行董事盛品儒須在7日內離職，照推算即9月2日或之前，亞視方面要作出回應。昨早未到9時，高層葉家寶上班時發現記者在門外等候，表示自己如常返工，當問到盛品儒會否上班時，他答：「暫時未知。」
出糧好準時
其後林紫君、蔡國威、亢帥克、顏子菲等藝員陸續現身，有的上課、有的錄影節目。蔡國威更表示剛與亞視達成續約協議，新約於9月1日生效，問到倘若亞視被吊銷牌照，會否擔心自己的合約受到牽連，他即答：「唔會，因為經過咗老闆發番落嚟就OK嘞。我真係唔擔心，覺得只要做好自己本分就得。（梁思浩話拖糧喎？）佢係外判節目，應該一早傾好咗出糧日，而近呢半年我哋出糧好準時。」
亢帥克擔心
身為「亞洲之子」的亢帥克被記者追問時，起初表示沒有留意相關消息，及後又禁不住謂：「梗係唔好有問題啦！亞視有幾千員工等住開飯，我唔希望亞視有任何變動。」當問到倘若亞視真的不能繼續營運，他有何打算，亢帥克即冷笑：「咁要睇吓有冇新東家請我囉。（同亞視仲有幾耐合約？）半年，依家未有人搵我傾續約。」
林紫君同樣表示冇留意新聞，又指自己很少返公司，未有與同事討論過問題。她更反問記者：「係咪要轉行？你哋請唔請人呀？」
文：影視組