三太代超蓮否認有新歡
賭王何鴻燊三太陳婉珍昨日以東華三院主席身份出席「新世界單車慈善錦標賽2013」記招，提到何超蓮早前被拍得與異性逛街，三太代女兒澄清沒有新歡：「冇！（佢仲係同吳克羣拍拖？）我唔知道。（最近囡囡少咗玩社交網站，係咪你叫？）佢哋自動自覺，唔使我叫。」之後她表示閒時有踩單車，但不擅長：「小朋友叻過我。囝囝鍾意踢足球，夜晚為咗踢波而唔食飯，話食得太飽踢唔到波。」
另外，名媛榮文蔚表妹鄭詩韻現身支持老公陳鴻業，陳鴻業是全盟體育有限公司主席，亦是單車運動愛好者。他說：「以前我打冰上曲棍球，但年紀開始老，成日受傷，復元時間耐，唔似啲後生仔，斷咗腳兩星期就好番，我要兩年。踩單車就係靠意志，我仲可以同後生仔競爭。（你經常贊助單車比賽？）想幫吓本地運動員，而且唔想年輕一代成日掛住打機，做運動有益身心。」
