AnaR生活就是愛
混血名模Ana R.因工作關係見盡頂級奢侈品，不過她所追求的優質生活絕非物質等奢華享受，而是愛。對她來說，生活就是愛，必須有愛才有生活，有愛才能讓她心靈得到真正滿足和感覺幸福。她渴望跟男友組織溫暖大家庭，可以一家人開開心心一起生活，擁有家人的愛就是她理想中的優質生活。
Ana R.早前到了「觀瀾湖‧海口國際度假區」享受假期，盡情Relax和充電，除了打Golf、泡浸各式主題溫泉以及在泳池戲水曬太陽，注重健康的她還一嘗養生水療，為身體進行內調外養。而她亦有自己的一套養生之道，由最基本但卻最重要的健康飲食開始。
近年她也努力在生活上的各方面取得平衡，積極工作之餘都會盡量抽時間陪伴男友Brad，甚至不介意為所愛作出犧牲，務求達至事業愛情兩得意。
記：記者
A：Ana R.
記：鍾唔鍾意按摩同做Spa？
A：鍾意，尤其係足部按摩同埋肩膊按摩，因為Model工作關係成日都要着高踭鞋，同埋我又會自備私伙用品開工，拎住好重嘅袋，小腿同肩膊肌肉自然特別攰同痠痛，好需要按摩嚟紓緩一下。我有時間就會去㗎喇，同Resort相比，香港嗰啲就比較Local同平價，可以當係急救即時紓緩，但就好難真正咁Relax到，例如你坐喺度做足部按摩，隔籬嘅客人就喺度食麵食到「雪雪」聲。但喺Resort就可以一整日好好咁享受，好Relax，成個感覺都好唔同，充滿熱帶風情嘅氣息，美麗嘅景致，令人心曠神怡。我遲啲會同Brad嚟度假，一齊試吓Couple spa，我覺得做Couple spa對兩個人之間嘅溝通好好，可以靜靜地咁傾吓偈，加上環境、氣氛、觸感仲有陣陣香氣，成件事好浪漫，就好似再次墮入愛河嘅感覺一樣。
愛大家庭
記：你會唔會幫Brad按摩？
A：會，我會幫佢按摩同做Spa，仲會幫佢做埋Facial Treatment。其實我自己喺屋企有時間都會浸吓腳，對血液循環好有幫助，尤其係我成日都手腳冰冷，加鹽用熱水泡腳10分鐘有助促進血液循環同排毒。
記：你嘅養生之道係咩？
A：盡量唔好食太甜，唔好食咁多鹽，太甜同太鹹都對身體無益。少啲出街食飯，可以嘅話就喺屋企煮，自己煮會知道每一個菜式嘅食材同成分，喺出面食就唔會知道，自己煮可以食得健康啲。
記：作為Model要經常化妝，好傷皮膚，你有咩護膚心得？
A：我好幸運遺傳咗媽咪（韓國人）嘅皮膚，而唔係爹哋（西班牙人），亞洲人嘅皮膚普遍比歐洲人好。我細個時媽咪已經幫我搽防曬品，教我要從小護膚，佢又唔畀我飲汽水，主要都係飲水同牛奶，飲食都好健康，內在健康，皮膚自然都靚啲健康啲。
記：對你嚟講咩謂之生活？
A：每個人對生活嘅定義同追求都唔同，有啲人覺得有錢先有生活，no money no life，有啲人覺得生活等同物質享受，對我嚟講，生活就係愛，有愛先有生活。我細個時屋企好窮，喺冇乜錢嘅環境下長大，錢同物質並唔係咁重要，呢啲始終係身外物，帶唔走，有愛先至係最重要嘅，可以令我心靈得到真正滿足同感覺幸福。
記：你所追求嘅生活質素係咩？
A：因為我覺得生活等如愛，所以我追求嘅生活質素就係要擁有一個大家庭，我希望我可以趕得切實現呢個夢想，我已經喺美國買咗一間大屋，為我將來嘅大家庭作準備，可以一家人開開心心一齊生活，擁有家人嘅愛就係我嘅優質生活。
記：你嘅生活享受係咩？
A：食嘢，我想食就食，唔會節食，品嘗美食我會好開心，尤其係同好朋友又或者所愛嘅人一齊食。
煮食減壓
記：因為鍾意食嘢，所以你煮嘢食咁叻？
A：我煮嘢叻係因為喺外面食唔到一啲我鍾意食嘅嘢，索性自己學煮，當我喺餐廳食嘢時發現自己煮得仲好食嘅時候會好開心，另一方面又覺得食咁嘅嘢好嘥錢，所以寧願自己喺屋企煮。同埋我細細個就學煮嘢食，因為以前媽咪要做三份工養大我同細佬，我要負責喺屋企照顧細佬同煮飯。我嘅Dream house要有個好大嘅廚房同後園，咁我煮完嘢食就可以同我嘅家人朋友一齊開Party聚餐。我喺美國間屋就係咁嘅！
記：生活上有冇面對咩壓力？遇到有壓力時，會點減壓？
A：喺工作上會有少少壓力，我咩Job都想做，唔會介意酬勞，但經理人公司好保護我，唔係咩都畀我接，呢種矛盾會令我感到有壓力。以前拍拖我會冇咩時間陪男朋友，喺感情發展方面亦有壓力，喺事業同愛情上令我好掙扎，依家同Brad一齊我放棄咗好多嘢，因為我好愛佢。我希望喺各方面都取得平衡，雖然唔容易做到，但我會努力，Balance of life好重要。我減壓嘅方法就係煮嘢食，焗蛋糕，可以分散注意力，我會好集中精神去做每一個步驟，咁就唔會再諗煩惱。我都會做瑜伽同做Gym。有次去旅行，Brad帶我去潛水，我有幽閉恐懼症，喺水底嘅感覺令我覺得好大壓力，好辛苦，同埋唔可以同人講嘢，只可以做手勢，見到得意嘅嘢都唔可以即刻講出嚟分享，好無趣，亦因為咁我發現原來我係鍾意講嘢嘅。
寫Blog分享經驗
談到未來大計，愛與人分享的Ana正計劃寫Blog做Blogger，她說：「我會寫有關時裝、Modeling、美容、烹飪同埋旅遊嘅嘢，將我嘅經驗同大家分享。有好多人喺網上問我意見，我都會盡量解答佢哋，我想成為一個大姐姐，去幫助其他人。除咗寫Blog，仲會拍埋片放上網。而Technical嗰part對我嚟講係最大難題，好彩有Brad，佢精於電腦編輯，係我嘅御用Editor同Technician。」
體驗養生水療
崇尚健康生活的Ana此行於度假區內的礦溫泉水療中心體驗了一個融合中西養生理念的養生水療，她說：「一開始會有中醫師幫我把脈了解我嘅體質，再為我揀選合適嘅中藥進行療程，以後仲會飲埋養生茶，可以針對性咁對我嘅身體進行內調外養。我深信一個人要內在健康，先可以由內至外散發出健康美態。」
採訪：張嘉敏
攝影：沈健程
服裝：Tommy Bahama