Alice B.驚聞靈體坐肚

農曆七月十四又到,不時都聽到好多古怪傳聞,又或者發生靈異事件,一班藝人不時出外工作一定遇過不少奇怪的事情,但正所謂平生不做虧心事,半夜敲門也不驚,Alice B.表示曾因媽咪遇到有嘢坐肚而即刻送媽媽去教堂,幸好之後就冇事。

岑麗香

「我曾經試過,喺溫哥華屋企瞓覺時突然醒咗,成個人都唔郁得,都幾驚,我叫自己鎮定啲,同埋個心不斷祈禱。」

黃宗澤

「有次喺外國做嘢喺酒店半夜見到有個人影行過,我唔係好驚,不過我又冇殺人放火,怕咩。之後我就係咁鬧佢,仲眼定定咁望住佢,同佢講唔好搞我同鬧爆佢,我覺得個影身形似男人。」

陳慧琳

「每次到外地工作,助手一定會將我哋拖鞋一前一後放,等啲鬼唔好走上床,點知有次瞓醒對拖鞋好整齊咁平放,搞到好驚。」

Alice B.

「我媽媽瞓覺曾經見過有嘢坐喺佢肚上面,之後送咗我媽媽去教堂就冇事。我當時係瞓佢隔籬,第二日起身我個心跳好快,感覺好寒唔舒服,唔知關唔關事。」

黃芷晴

「其實我好驚玩機動遊戲,好怕離心力嗰種感覺。有次同班朋友去主題公園玩,畀班friend捉咗去玩海盜船,我都已經好驚!不過如果將來工作需要,我都會去克服。」

傅嘉莉

「有次去泰國拍戲,喺一間醫院拍外景時,好多人都聽到有啲怪聲,嗰晚有男劇組人員話佢喺酒店房有「人」敲佢房門,但打開門又咩都見唔到。」

姜麗文

「有次同一班朋友去日本富士急遊樂場嘅鬼屋玩,玩完其中一個男仔朋友話個膊頭好重,好似孭住啲嘢咁,佢即刻打畀一個對靈界有認識嘅Auntie求救,點知佢講電話時,我哋不停聽到電話另一邊傳嚟啲「嘰嘰」聲嘅笑聲,忍唔住問個男仔,佢聽唔到嗰啲笑聲。之後佢重病咗個幾星期,搵完個Auntie先無事。」