蔚雨芯大個女捨易取難

狄易達：狄　

蔚雨芯：蔚

識於微時信是有緣

蔚：師兄，數數手指原來我哋都識咗好多年喇，記得當年我14歲時，第一次見到呢位哥哥仔，覺得你都幾靚仔，之後你仲畀咗段打觔斗嘅片畀我哋睇，show off自己，我真係好佩服你呀！

蔚雨芯早前出寫真，狄易達大讚睇完振奮人心。

蔚雨芯在達仔的演唱會出任嘉賓。

狄：其實我覺得呢啲係緣分嚟嘅，仲好記得你未出道前成個細路女咁，完全幻想唔到你依家變化咁大，喺各方面都有好大嘅變化！

蔚：哎呀，咁我細個嘅時候乜都唔識吖嘛，但我好記得，你以前成日話我濃妝！

狄：吓……咁你都仲記住，不如我哋講吓其他嘢啦，你應該多謝我呢個師兄嘅教導至啱呀。

蔚：係嘅係嘅，知道知道！

狄：你都大個女啦，點解未見你有男朋友嘅？不過你唔好睇中我喎！

蔚：咁你可以放心喎，如果我揀男朋友都會想揀圈外人，因為可以擴闊自己眼光，反而如果同圈中人拍拖會好尷尬。

新人唔易做欠信心

狄：咁我又想問吓你，出道一段時間，你覺得做新人最大嘅困難係咩呢？

蔚：做新人時，最困難係要別人認得我，因為缺乏自信，唱歌又怯場，所以明明喺屋企已經狂練，練得好好，一出到台見到咁多人就怯。但係出道一年後，自信心的確係高咗，除咗唱歌，我仲接觸咗好多唔同範疇嘅工作，其實我都想跟師兄殺入年輕人嘅市場o架。

狄：Rainky真係好努力，佢好識運用自己嘅天賦身材，加上又靚女，其實真係多咗好多人認識佢！

蔚：太客氣喇，我仲要跟師兄學嘢。咁你新人嘅時候有咩困難呢？

狄：依家諗番起做新人時真係好刻苦o架，記得有一次同曾志偉、杜汶澤拍通宵，我一路拍一路舂下舂下，一失神就瞓着，惟有係咁摑自己提神，相反志偉同阿澤仲好生猛，就算幾攰都可以面不改容！

蔚：哈哈！咁犀利！

狄：係呀，老闆叻哥（陳百祥）都係我嘅榜樣，時刻提醒我「玩時玩，認真時認真」，我好佩服佢成日同我哋玩到好夜，第二朝仲可以凌晨四、五點一早起身去睇晨操！

開騷出書各有發展

蔚：咁你依家都係近乎呢種生活吖，朝早起身拍劇，夜晚就為演唱會綵排，聽講你個演唱會有啲撒手鐧喎，講啲嚟聽吓！

狄：今次真係唔簡單，我請咗個舞台設計師，係幫過郭富城嘅，所以我都會學城城咁挑戰好多高難度嘅動作，實行飛天遁地，玩轉會場，當然，唔少得同你嘅合唱啦！

蔚：好多謝師兄邀請我做嘉賓，到時我唔會令你失望o架！

狄：一言為定，我覺得今年我哋都算係有啲成績，我開個唱，你就推出寫真，我有睇你本作品o架，我將佢鎖咗喺我跳舞學校嘅櫃入面，不過我就收埋咗條鎖匙，唔會畀人隨便拎嚟睇。

蔚：咁啲dancers咪冇得睇囉？

狄：佢哋成日哄埋塊玻璃度，側晒頭喺度睇，真係好搞笑，我話要請我食飯先至畀鎖匙，哈哈。

蔚：咁佢哋有冇畀評語呀？

狄：佢哋都話睇完好醒神呀，簡直振奮人心！

後記

由於拍照當日為戶外，不時有怪風吹亂Rainky個頭，師兄狄易達都會替她「撥亂反正」，Rainky又說出道至今，不時都孖住師兄出出入入，兩人簡直情如兄妹。Rainky記得有次兩人同車時，達仔正與跳舞學校的職員講電話，語氣重得來極具老闆風範，Rainky都忍唔住說：「當時師兄好認真，態度好強硬，冇畀佢嚇親，反而覺得佢好有型。」

文：音樂組　

攝：沈健程