Eason尾場騷崩潰鬧歌迷
陳奕迅（Eason）的25場演唱會前晚於歡呼聲中結束，有「吹神」之稱的Eason過去24場為保靚聲均不敢多言，抑遏多時的他於尾場終於爆煲，加上遭歌迷激親，令大情大性的Eason變身「牢騷王」，連珠炮發地指歌迷不守規矩令他心情欠佳，向歌迷做出dislike手勢的他更直認：「我有少少慶！」
「吹神」陳奕迅（Eason）前晚在尾場「Johnnie Walker Eason's LIFE香港演唱會」上大唱大跳，專業的他為免聲帶受損，於過去24場只以歌會友，忍口24日的Eason前晚終按捺不住，於Encore時間吹水近廿分鐘，結果凌晨12時才完騷，被場館罰款五位數。Eason演出期間多次受歌迷騷擾而發忟憎，他先用手指指腦袋暗示亂叫的歌迷冇腦，又不滿「山頂」歌迷胡亂叫囂，Eason說：「你不如問王菲借大聲公，聽唔到你講乜，溝通唔到。」唱到快歌時，他見歌迷未肯起身跳舞，竟突然單膝跪向觀眾說：「皇上請起，一請、二請、三請。」但歌迷依然不為所動，氣得Eason說：「原來係跛嘅！」
自認「國際級」
全晚不停化身牢騷王的Eason見握手時歌迷掛住用手機拍照大感不滿，先搶歌迷手機扮掟落台，接住又向歌迷做出「手指公向下」的dislike手勢，真性情的Eason說：「上載啲嘢（指照片）上網係咪咁重要？唔好意思，我有少少慶！」一輪發炮後，Eason似意識到有點失態，他補鑊說：「人愈大有好多說話，唔緊要，我有一排唔會喺香港開騷，我係世界級。」早前與章子怡為內地唱歌比賽節目《中國最強音》擔任評審的Eason續笑說：「我識章子怡，章子怡坐我隔籬，我仲唔係國際級？」完騷前，Eason表示有要事宣布：「好想同你哋啲VIP講，我堅持做完騷唔影合照，好攰，同埋唔再錄宣傳片。我愈來愈懶，日後名都唔簽改咀嘴。」
吻賀陳家瑛
雖然Eason整晚發牢騷，但亦有滿足歌迷握手欲望，甘冒跌台危險趴地跟歌迷握手，之後轉身瞓在台上獻唱，最後以「蜈蚣彈」起身，接住自彈自唱寫給老婆徐濠縈的新歌《床前床尾》。由於昨日是Eason經理人陳家瑛生日，Eason前晚出席慶功宴時率領全場唱生日歌送對方，又親吻「契媽」陳家瑛。受訪時，對於有指他患上躁鬱及人群恐懼症，Eason表示：「我喺台上講過，（使唔使睇醫生？）我又唔使睇喎，（台上嘅說話有感而發？）心情少少唔好。」Eason被問好友謝霆鋒傳與周迅拍拖一事，他說：「真係唔知，感情嘢唔答，我覺得唔係。（霆鋒搬咗？）係？我哋真係唔係好朋友囉。」
曾為無綫劇集《衝上雲霄》獻唱主題曲的Eason自爆知道開拍第二集後曾自薦，但因當時「四大」問題未解決而作罷。他又讚林子祥主唱的第二集主題曲幾好聽，並稱大家太快評價。
採訪：音樂組