陳奕迅牛一 霆鋒送驚喜

陳奕迅（Eason）於紅館的《Eason's LIFE演唱會》前晚踏入第二十場，適逢他39歲生日，其屋企人、圈中好友謝霆鋒、房祖名、梁漢文等、中學同學和老師齊集紅館為他慶祝，而王力宏、陳妍希、薛凱琪（Fiona）等亦現身捧場。

當晚Eason特別風騷，在獻唱《活躍症》時指導全場玩人浪，尾聲唱《時代曲》時，有觀眾自發性唱起生日歌，Eason揹着結他笑說：「係，今日係我生日，我收到好多祝福、短訊、禮物，我得到好多愛同埋正能量，我將呢廿晚嘅力量同埋愛同大家分享，如果有咩摩擦就由佢，睇開啲，我嘅生日願望係希望大家都開心，多謝晒。」

圈中一班好友現身為Eason慶生。

霆鋒驚喜現身，送蛋糕畀壽星仔Eason。

Fiona黐祖名睇騷

當Eason安歌大跳《重口味》後，現場突然響起生日歌前奏，霆鋒和蛋糕齊齊升上台，蛋糕以舞台為模型，中間站着Eason的卡通人像，被蒙在鼓裏的他驚訝地對霆鋒說：「做乜嘢啊？你條友吖。」霆鋒笑道：「你嘅經理人囉。」Eason更高興地介紹好友和哥哥：「呢班係我嘅好朋友，呢個係我親生哥哥，佢醉咗，醉咗兩個禮拜，多謝你哋。」他又指住蛋糕上的人像說：「呢個鼻咁大似房祖名喎，又有啲似林子祥，側邊就似希治閣（電影導演）。」之後蘇永康叫他快唱歌，他卻說：「係咪叫蘇永康唱歌？唱咩歌？我幾晚無安歌。」

Fiona與祖名齊齊睇騷，興奮合照。

徐濠縈（左）

Eason最終都沒有令觀眾失望，在好友識趣落台後，連續安歌三首《明年今日》、《單車》和《與我常在》。對於好友送上意外驚喜，Eason謂全不知情，又表示當唱完《重口味》後，監製騙他升降台故障，突然看到霆鋒出現，及一班好友衝出來，亦嚇了一跳。

Fiona當晚在instagram上載與Eason老婆徐濠縈和緋聞男友房祖名在台下的合照，相中Fiona企中間，毫不避嫌與房祖名身貼身，表現大方。

文：音樂組