蔚雨芯肉搏舞男 瞓身任捽
歌手蔚雨芯前晚搏到盡以開衩貼身裙出席音樂會，遭男舞蹈員由腰捽到大髀，期間她瞓在男舞蹈員背脊時不慎露「白底」，當轉身及扭腰時又打出「八月十五」，明顯用「股惑」俘虜歌迷心。
蔚雨芯（Rainky）、吳若希（Jinny）、胡鴻鈞及洪卓立（Ken）等歌手前晚出席音樂會，打頭陣的Rainky大騷美好身材，穿上露背緊身開衩連身裙出場，並與男舞蹈員跳辣身舞，又轉身又扭腰，由於裙尾不斷飛起露出「八月十五」，期間遭男舞蹈員由腰摸到大髀，Rainky最後索性躺在對方背脊，可惜裙邊被扯高令「白底」現人前。
吳若希冧張智霖
事後Rainky坦言做足安全措施，她說：「驚走光着咗一條底褲、兩條打底褲。（着T-back？）唔夠膽。」問到被男舞蹈員摸有否尷尬？她說：「唔會，注意力喺唱歌度。」
同場的Jinny被問到有指她曾與填詞人梁柏堅拍拖？她笑住否認：「我哋係好好朋友，從來冇一齊過。」Jinny坦言初入行與對方非常投契，曾相約食飯傾心事，她說：「佢畀好多意見我。（追你？）冇，佢係才子，我鍾意張智霖嗰種顧家同笑容好sweet類型。」對於有傳兩人以老公老婆相稱，Jinny大笑說：「黐線，我哋係叫肥仔、肥婆。」
另外，近日努力健身的Ken坦言獲緋聞女友湯怡讚大隻，他笑說：「操咁耐唔係冇嘢睇呀。」
採訪：音樂組