霆鋒斟李雲迪教仔彈琴

謝霆鋒、鋼琴王子李雲迪及已故全國政協副主席安子介外孫、青聯籌委會副主席楊鼎立三人老友鬼鬼，前晚相約到灣仔日本料理餐廳飯聚，約晚上11點離開時，見霆鋒打扮casual，格仔衫、牛仔褲、踢拖上陣，而近期在各地巡迴演出、日前在上海出席新店剪綵的李雲迪，步出餐廳時仍電話傾唔停，足見貴人事忙。之前豪買五百萬勞斯萊斯給父親謝賢的霆鋒，未知今次會否趁此機會，大打友情牌請李雲迪做兩個囝囝Lucas及Quintus的音樂教師，給他們灌輸音樂才華。

大談時間管理

而今日霆鋒在楊鼎立的邀請下，將出席亞洲國際博覽館的青年創業論壇大展廚藝，並會與阿里巴巴集團主席兼創辦人馬雲、摩根大通證券亞洲區副主席方方等商界巨頭「平起平坐」作嘉賓，商界地位大躍升！其實霆鋒創立的POST PRODUCTION朝霆製作公司（PO朝霆），8年狂賺6億元成績蜚然，早令他成新一代商界尖子。

楊鼎立負責接送李雲迪及霆鋒離開。

楊鼎立邀請霆鋒出席今日的青年創業論壇。

昨日霆鋒接受電話訪問時表示：「大家識咗一段時間，係朋友飯聚。（搵李雲迪教囝囝音樂？）暫時冇諗，係朋友見面傾吓偈。（點解喺創業論壇煮嘢食？）因為講創業心得時，想用煮嘢食嚟表達Time Management（時間管理）。我又係演員、又要管理『PO朝霆』、又係爸爸、仲要投資！就好似煮嘢食，同一時間可能要煲湯、煮牛排同焗嘢咁，同時兼顧好多嘢！我好鍾意煮嘢食，所以希望藉此現身說法。」他又自言能與馬雲等人同場十分開心，希望可以趁機學習。

召集人霍啟剛

另外，昨日記者致電楊鼎立時，他說：「大家朋友食飯，加上霆鋒聽日（今日）會出席青年創業論壇。（點解請霆鋒做嘉賓？）佢係一個好傑出嘅演員，就算咁忙都可以將『PO朝霆』搞得咁好，想佢同年輕人分享創業心得，何況佢咁有吸引力！」而快將做人老竇的霍啟剛，今日亦會以活動召集人身份出席。

文：專案組

攝：追蹤組