王璐瑤寸本性難移

性感女星王璐瑤（LuLu）去年自爆與余文樂互傳情慾短訊，成為一時熱話！對於「樂霏戀」突然玩完，昨日身在內地的LuLu得悉後大感驚訝，但仍不忘寸爆樂仔：「仲以為佢難得定落嚟玩認真，到最終得幾個月貨仔，原來都係本性難移！（戥Kary唔抵？）好難講嘅，可能佢睇清楚某啲人，先作出呢個決定。」問到若樂仔轉回單身，會否再考慮對方？LuLu即落閘Say No：「梗係唔會啦！見過鬼仲唔怕黑？我依家好清楚自己想要啲咩嘢！」至於樂仔好友杜汶澤與張智霖均封嘴避談，統統不回應樂仔分手一事。