陳豪急補飛 多倫多擺酒

新婚的陳豪及陳茵媺(Aimee)於早前巴黎豪花逾300萬港元舉行浪漫婚禮後,便燦爛歸於平淡,陳豪返港急搵奶粉錢,但在多倫多有頭有面的外父卻「詐晒型」,不滿無聲無息送愛女出嫁而冇機會向親友交代,陳豪得聞即出招「補飛」,現定於7月17日在多倫多擺酒,作為Aimee的Uncle邵氏高層黃家禧昨亦親證這個花月佳期,更給陳豪101分,讚他照顧世姪女好到加零一。

現年42歲的陳豪與32歲的陳茵媺(Aimee)於本月12日在巴黎公布喜訊,但Aimee只於翌日在微博上載與陳豪的婚照,一對新人並未設宴高調慶賀結婚之喜,很多親朋戚友只能遙遠祝福,總覺有點不足;加上Aimee在多倫多經營酒家生意的父親陳炎森可謂有頭有面,眼見送愛女出嫁卻未能與眾親友交代而頗有微言,陳豪為了氹外父大人開心,一於出招「補飛」,原意將婚宴搞得好好睇睇的他,計劃在當地酒店豪擺婚宴,但Aimee父親卻想在主場宴請親朋,陳豪為不敢逆外父大人意,最後遵命於外父在多倫多經營的麗晶酒家舉行「豪宴」,一圓雙親意願,又可讓懷有身孕的愛妻Aimee不用頻撲,安在主場酒家接受親友到賀,待胎兒穩定再返港擺酒。

黃家禧讚101分

今次多倫多「豪宴」除廣邀雙親之親友外,身為Aimee Uncle的邵氏高層黃家禧亦是被邀請之列,但他公務繁重而未能飛往到賀:「7月17嘛!我知,Aimee有請我,佢又同我講係機位高峰期,難訂機票,叫我如果唔方便唔使過去,而我嗰段時間又真係好忙去唔到,不過就算今次冇到賀都唔緊要,Aimee話會返嚟香港再請食飯,到時我咪再去賀佢囉!我個人唔到啫,我個心都飛咗過去,仲要做份禮畀佢,(送BB嘢?)或者係啦!」黃家禧與陳炎森交情始於92年移民當地,因常到其經營之酒家而成好友,問到世姪女Aimee嫁陳豪之評價?他說:「如果100分係滿分,我畀佢101分啦,佢照顧Aimee好到加零一。」

返港再請好友食飯

至於身為Aimee「契哥」的麥長青(麥包),上次雖未被邀請出席其巴黎婚禮,不過今次多倫多「豪宴」卻成被邀對象,可惜麥包因忙拍劇集《守業者》而未能到賀,記者起初問會否到賀時,他還扮唔知,後記者再問7月17喎?他才笑說:「佢之前都有提過,話可能會女家嗰邊再擺,不過就冇講實邊一日,佢都係打電話畀我太太,邀請我哋一家過去,(到賀嗎?)我過唔到去啦!依家仲拍緊《守業者》,要拍到九月。(咁會否將份禮物叫陳豪帶埋過去?)龍鳳鈪呀嘛!等佢哋通知我日子先啦!」而無綫高層樂易玲不諱言陳豪曾跟她表示會於多倫多擺酒,但都只請親戚,她又謂:「佢話會再返香港請食飯,到時再祝賀佢。(送乜禮物?)畀利是係最實際,不過阿Mo(陳豪)間屋成三千呎,可以送啲特別大型家品畀佢,我都要出遊,等我搜羅一下。」

文:影視組

第一手消息請下載on.cc東方互動iPhone/iPad/Android Apps