蔣怡驚爆患妊娠糖尿
名模蔣怡（Coco）懷孕近9個月，下月即將臨盆，她現時已全面停工靜心在家養胎，日前她與珠寶設計師老公翁狄森（Dickson）齊齊現身中環，全程與老公十指緊扣，儼如女王駕到！不過昨日蔣怡驚爆原來兩個月前患上妊娠糖尿病，幸她性格樂觀，且有老公錫住，一於少擔心。
Coco上周完成手上的工作，便全面停工在家養胎，日前她與老公齊到中環shopping，穿上橙色吊帶連身短裙，腳踏短boots的她，雖然懷孕近9個月，但步履輕盈，手腳依舊纖瘦，沒一般孕婦的水腫。Dickson陪Coco到中環髮型屋整理頭髮後，兩人便手拖手拍拖行街街，時值下午時間，中環人來人往，Dickson全程拖實Coco，有老公在旁充當保鏢下，Coco小鳥依人，途經一名賣白蘭花的老伯時，她撒嬌要求老公買花，Dickson二話不說即時送花冧妻。
喪玩BB用品
其後兩人進入一間BB用品店，在店內左顧右盼，對於BB梳化、玩具、奶粉和書本所有東西也感興趣，但齋睇冇買，期間見Dickson在店員前指手畫腳，原來他們正找尋一個用作吊起BB飾物的吊架，Dickson與Coco研究一番，Dickson突然大聲說：「其實我哋用一支樹枝，然後用麻繩紮住佢都得！唔使用吊架。」Coco微笑點頭。當Coco行過BB床時，發現一個巨型的恐龍毛毛玩具，更一時貪玩將大恐龍放上Dickson的背上，兩人嬉戲一番，認真大唔透。
樂觀唔擔心
行了近大半個小時，他們走到一間日本餐館，只見Coco大口大口吃飯，胃口奇佳。事後致電Coco，她驚爆自己要控制飲食：「其實我要戒甜、戒澱粉質，因為兩個月前醫生話我有妊娠糖尿病，我不嬲好鍾意食甜嘢，不過大肚時口味變咗，食得好清淡，可能肚裏面嘅BB唔鍾意食啩，因為成日覺得肚餓，所以食得更多甜品。（擔唔擔心？）醫生驚BB過大，叫我睇營養師，不過我唔擔心，不嬲我都鍾意食甜嘢，糖分高係好正常，可能醫生唔知啫，哈哈！」她說懷孕後，老公和家人當她女王一樣，甚麼也不用她做，她笑言反而擔心產後不再做女王會不習慣。
文：名人組