萬綺雯 張文慈雪中姊妹情
張文慈（Pinky）相約萬綺雯（蚊蚊）聊天，她倆「自動波」夾衣飾、髮型、借地方全部有商有量，甫見面便攬攬抱抱，「恩愛」之情羨煞旁人，誰說娛圈花旦沒有真感情？兩杯紅酒到肚，情感抒發再見高潮，Pinky感激蚊蚊沿途雪中送炭，蚊蚊即矯正她說：「雨中送遮好聽啲喎。」眼泛淚光的一雙好姊妹隨即破涕為笑！而二人互相關心，竟是由Pinky怕黑的「驚」歷開始……
萬 = 萬綺雯
張 = 張文慈
多謝照顧包容
張：知你最近好忙，WhatsApp你叫你出嚟，估唔到咁快就覆到時間。
萬：識咗你咁耐，都未試過叫我幫手，平日你乜嘢都鍾意靠自己，所以嚇到我連短訊都唔覆，直接打畀你。
張：我想講……好多謝你一直以嚟嘅照顧同愛錫，記得當年同你喺北京拍劇，因為我怕黑，你即刻教我唸心經（按：當時Pinky仍未篤信基督）。我哋可以話一齊長大，當時我嘅情緒化同缺乏安全感，真係幾討人厭，好彩你識得包容，其實你對每一個人都好照顧。可能你唔記得嘞，有次我激嬲你，內疚咗好耐，後來終於搵到機會同你道歉。
超級衝鋒車
萬：你大個女咗嘞！你份人我又點會唔了解呢？我記得你講邊次，當時已知你一定會內疚，但我想話畀你聽：我根本冇嬲過，唔講出嚟係想嚇吓你啫，哈哈……。有時人與人之間嘅誤會，係因為身邊有人講咗好多嘢，我好清楚成件事。認識你之前，我喺圈中出名心直口快，得罪咗人都唔知，點知一山還有一山高，你係一架「超級衝鋒車」，仲勁過我！
張：我企硬係因為想保護自己，唔想畀人蝦。
萬：就係知道你敏感，所以我會揀適當嘅場合先叫你join埋一齊玩，好似大姐明（林建明）嘅活動，全部都係熟人，先敢叫你出嚟。雖然我哋可能一年只見一、兩次，不過我想話畀你聽我成日都好掛住你，有時醒起，咪喺微博睇吓你嘅消息，睇吓你搞緊乜囉，（目及）實你o架！
「十三超級錫你」
張：我都有留意你嘅新聞，你同老公十三（陳十三）好sweet喎！
萬：講起佢，我想話你聽佢都好錫你。可能你唔知，當年佢寫《我和殭屍有個約會》「未來」一角，真係為你度身訂造，嗰時佢唔識你，但竟然花咗好多時間翻查你拍劇嘅錄影帶，特別留意NG片段，再加上你接受記者訪問時嘅語氣同舉動，從中認識真正嘅你，結果就寫成咗角色人物性格，所以我成日都話，佢對你嘅了解不下於我，只不過佢依家做咗我老公，讓唔到畀你嘞，嘻嘻。
張：我都知佢錫我嘅……我早前都追你嗰套劇《老表，你好嘢！》，仲由頭睇到落尾，追劇追成咁都係第一次咋。好期待《好心作怪》你會創出唔同戲路，不過睇螢光幕你好瘦，捱唔捱得住o架？
有諗過生B
萬：冇捱嘅，我肯做，係因為我真係鍾意做，不過嗰時啱啱做完盲腸手術，天氣酷熱又要適應新環境，真係瘦到得番九十六磅咋，嗰時日日飲三杯營養奶都谷唔肥。其實都有諗過推劇休息吓，點知個角色係我從來冇做過，終於又走唔甩，好想拍囉。
張：十三冇詐型咩？
萬：佢畀好大自由度我，最緊要係我識得照顧自己啫。我哋兩個相處好似細路咁，有時你窒我，有時我嚇吓你。我成日都講笑咁話：「信唔信我爆你啲嘢畀記者聽」，哈哈！
張：其實有冇諗過同老公生番個BB？
萬：我OKo架，可以諗諗佢喎，哈哈。
張：睇到你就幸福嘞，羨慕死隔籬咩……其實你點解讀「幸福」兩個字？
萬：幸福係要自己爭取嘅，唔係靠人畀，如果要靠人先覺得幸福，咁幸福極都有個譜啦，你呢？
張：依家好簡單，覺得有愛就有幸福，夠食夠用就應該感恩，所以我每日都好開心。
後記：大傻勁傻有傻福
Pinky與蚊蚊的感情盡在骨子裏，這份姊妹情，某程度上血濃於水。蚊蚊繪形繪聲的形容她們私底下暱稱的由來，自爆老公叫「小傻」，自己是「大傻」，而Pinky則是「勁傻」，然後「勁傻」為「大傻」送上一條白紗裙作小禮物。早前蚊蚊應邀與hit爆全城的黃鴨拍照作慈善用途，即穿上好姊妹的「心意」去行善，然後「大傻」於微博留言答謝「勁傻」……還望世上所有傻人都有傻福！
文：影視組
攝影：劉智源
化妝：Stephen Lau@Stephen makeup、Lu Makeup
髮型：Ethan Ng@Hair、Domanic Tao@Orient 4
場地：Havana